March 31, 2023
March 31, 2023
ന്യൂസ്റൂം ബ്യൂറോ
തിരുവനന്തപുരം: പ്രശസ്ത സാഹിത്യകാരി സാറാ തോമസ് (89) അന്തരിച്ചു. വാര്ധക്യസഹജമായ അസുഖത്തെ തുടര്ന്ന് പുലര്ച്ചെ നന്ദാവനം പൊലീസ് ക്യാംപിനു സമീപത്തെ മകളുടെ വസതിയിലായിരുന്നു അന്ത്യം. സംസ്കാരം നാളെ പാറ്റൂര് മാര്ത്തോമാ പള്ളി സെമിത്തേരിയില് നടക്കും.
17 നോവലുകളും നൂറിലേറെ ചെറുകഥകളും രചിച്ചിട്ടുണ്ട്. കേരള സാഹിത്യ അക്കാദമി പുരസ്കാരം ഉള്പ്പടെ നിരവധി പുരസ്കാരങ്ങള് നേടിയിട്ടുണ്ട്.
1934 ല് തിരുവനന്തപുരത്താണ് സാറാ തോമസിന്റെ ജനനം. 'ജീവിതം എന്ന നദി'യാണ് ആദ്യ നോവല്. സാറാ തോമസിന്റെ മുറിപ്പാടുകള് എന്ന നോവല് പിഎ ബക്കര് മണിമുഴക്കം എന്ന സിനിമയാക്കി. സാറാ തോമസിന്റെ അസ്തമയം, പവിഴമുത്ത്, അര്ച്ചന എന്നീ നേവലുകളും ചലച്ചിത്രങ്ങള്ക്ക് പ്രമേയങ്ങളായിട്ടുണ്ട്.
തമിഴ് ബ്രാഹ്മണരുടെ ജീവിതം ചിത്രീകരിച്ച നാര്മടിപ്പുടവ എന്ന നോവലിന് 1979ല് കേരള സാഹിത്യ അക്കാദമി പുരസ്കാരം ലഭിച്ചു. നാര്മടിപ്പുടവ, ദൈവമക്കള്, അഗ്നിശുദ്ധി, ചിന്നമ്മു, വലക്കാര്, നീലക്കുറിഞ്ഞികള്, ചുവക്കും നേരി, ഗ്രഹണം, തണ്ണീര്പ്പന്തല്, യാത്ര, കാവേരി എന്നിവയാണ് സാറാ തോമസിന്റെ ശ്രദ്ധേയമായ കൃതികള്.
ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക https://chat.whatsapp.com/KIGk615xlF1ILlMGxpUXqI