February 26, 2023
February 26, 2023
ന്യൂസ്‌റൂം ബ്യുറോ
ദോഹ : 12-ാമത് ഖത്തർ ഇന്റർനാഷണൽ ഫുഡ് ഫെസ്റ്റിവൽ (ക്യുഐഎഫ്എഫ്) മാർച്ച് 11 മുതൽ 21 വരെ നടക്കും. ലോകകപ്പിന് ശേഷം ഖത്തറിലെ താമസക്കാരുടെയും സന്ദർശകരുടെയും ഇഷ്ട കേന്ദ്രമായി മാറിയ ലുസൈൽ ബൊളിവാർഡിലാണ് ഇത്തവണ മേള നടക്കുക.
നേരത്തെ അൽ ബിദ്ദ പാർക്കിൽ നടന്ന 11-ാം പതിപ്പിന് സമാനമായി, തത്സമയ പാചക പ്രദര്ശനത്തിനുള്ള വേദിയും വര്ക് ഷോപ്പുകളും ഇത്തവണയും ഉണ്ടാകും. മേളയുടെ ഭാഗമായി മാസ്റ്റർ ക്ലാസുകളും ലൈവ് കുക്കിംഗ് ഷോകളും അരങ്ങേറും. എല്ലാവർക്കും പ്രവേശനം അനുവദിക്കുന്ന വിഐപി ഏരിയയും ക്ഷണപ്രകാരം മാത്രമുള്ള മറ്റൊരു വിഐപി ലോഞ്ചും ഇത്തവണത്തെ പ്രത്യേകതകളാണ്.
മെക്സിക്കൻ ടാക്കോസ്, ലൈബീരിയൻ റൈസ് ബ്രെഡ് തുടങ്ങിയ അന്താരാഷ്‌ട്ര വിഭവങ്ങളും പാചകരീതികളും കൂടാതെ, മക്‌ബൂസ്, ലൂയിഖാമത്ത്, കാരക് ടീ എന്നിവയുൾപ്പെടെയുള്ള സ്വാദിഷ്ടമായ ഖത്തരി വിഭവങ്ങൾക്കും ഇക്കുറി പ്രാധാന്യം നൽകും.ലോകത്തിലെ ഏറ്റവും മികച്ച ഭക്ഷണവിഭവങ്ങളുടെ ആഘോഷമാണ് ഖത്തർ ഇന്റർനാഷണൽ ഫുഡ് ഫെസ്റ്റിവൽ.
വൈവിധ്യമാർന്ന ഭക്ഷണവിഭവങ്ങൾക്കൊപ്പം, എല്ലാ ദിവസവും രാത്രി 9 മണിക്ക് കരിമരുന്ന് പ്രയോഗം, റോവിംഗ് എന്റർടെയ്‌നറുകൾ, സ്കൈ ഡിന്നർ, ടീ വിത്ത് ഹാരോട്സ്, കിഡ്‌സ്‌മോണ്ടോ / കിഡ്‌സാനിയ), ഐസ് റിങ്ക് തുടങ്ങിയ വിനോദ പരിപാടികളും അരങ്ങേറും.
ദിവസവും ഉച്ചക്ക് 2 മണി മുതൽ രാത്രി 11 മണി വരെയും വാരാന്ത്യങ്ങളിൽ 2 മണി മുതൽ പുലർച്ചെ 1 വരെയുമാണ് പ്രവേശനം.പ്രവേശനം സൗജന്യമായിരിക്കുമെങ്കിലും ഖത്തർ ടൂറിസം വെബ്‌സൈറ്റ് വഴി മുൻകൂട്ടി രജിസ്റ്റർ ചെയ്യേണ്ടതാണ്.
മെട്രോ (QNB മെട്രോ സ്റ്റേഷനിൽ ഡ്രോപ്പ് ഓഫ്), ടാക്സി അല്ലെങ്കിൽ സ്വകാര്യ കാർ വഴി ഫെസ്റ്റിവൽ നടക്കുന്ന ലുസൈൽ ബൊളിവാർഡിൽ എത്തിച്ചേരാം.
ന്യൂസ്‌റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/LiM4EdDAtkTAmYRCb0LMz9 എന്ന ലിങ്കിൽ ജോയിൻ ചെയ്യുക
