March 30, 2023
March 30, 2023
ന്യൂസ്റൂം ബ്യൂറോ
തിരുവനന്തപുരം: വിമാനയാത്രാ നിരക്ക് വര്ധനയില് കേന്ദ്ര ഇടപെടല് വേണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയന് പ്രധാനമന്ത്രി നരേന്ദ്ര മോദിക്ക് കത്തയച്ചു. ഗള്ഫ് രാജ്യങ്ങളിലേക്ക് മിതമായ നിരക്കില് ചാര്ട്ടേഡ് വിമാന സര്വീസ് അനുവദിക്കണമെന്നും കത്തില് ആവശ്യപ്പെട്ടിട്ടുണ്ട്. വിമാന ടിക്കറ്റ് നിരക്ക് കുത്തനെ ഉയര്ത്തിയ സാഹചര്യത്തിലാണ് നടപടി. ഏപ്രില് രണ്ടാം വാരം മുതലാണ് അധിക വിമാനങ്ങളും ചാര്ട്ടേഡ് വിമാനങ്ങളും ബുക്ക് ചെയ്യാന് സംസ്ഥാന സര്ക്കാര് ആലോചിക്കുന്നതെന്നും കത്തില് പറയുന്നു.
അനിയന്ത്രിത നിരക്ക് വര്ധന പ്രവാസികളെ വലയ്ക്കും. നിരക്ക് വര്ധന സാധാരണക്കാര്ക്ക് വലിയ തിരിച്ചടിയാണെന്നും മുഖ്യമന്ത്രി കത്തില് ചൂണ്ടിക്കാട്ടി. തിരക്കേറിയ അവസരങ്ങളില് വിമാന കമ്പനികള് അമിതനിരക്ക് ഈടാക്കുന്നത് നിയന്ത്രിക്കാന് എയര്ലൈന് കമ്പനിയുമായി കേന്ദ്ര സര്ക്കാര് ചര്ച്ച നടത്തണമെന്നും കത്തില് ആവശ്യപ്പെട്ടു.
ഗള്ഫ് രാജ്യങ്ങളില് നിന്ന് കേരളത്തിലേക്കുള്ള വിമാന ടിക്കറ്റ് നിരക്കില് കഴിഞ്ഞ രണ്ട് മാസത്തിനിടെ മൂന്നിരട്ടിയിലധികം വര്ധനയാണുണ്ടായത്. ഫെസ്റ്റിവല് സീസണുകള്, സ്കൂള് അവധികള് തുടങ്ങിയ സമയങ്ങളില് ടിക്കറ്റ് നിരക്ക് വര്ധിപ്പിക്കുന്നത് സാധാരണ യാത്രക്കാര്ക്ക് ബുദ്ധിമുട്ട് സൃഷ്ടിക്കുമെന്ന് പിണറായി വിജയന് കത്തില് പറഞ്ഞു.
ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക https://chat.whatsapp.com/KIGk615xlF1ILlMGxpUXqI