September 17, 2023
September 17, 2023
ദോഹ: വിമാന സർവീസുകളുടെ എണ്ണം വർധിപ്പിക്കണമെന്ന ഖത്തറിന്റെ അഭ്യർത്ഥന തള്ളിയ ഓസ്‌ട്രേലിയൻ സർക്കാരിന്റെ നടപടിയെ ഖത്തർ എയർവേയ്‌സ് അപലപിച്ചു.
ഓസ്‌ട്രേലിയയിലെ വിവിധ വിമാനത്താവളങ്ങളിലേക്ക് ആഴ്ചയിൽ 21 അധിക വിമാനങ്ങൾക്കുള്ള ഖത്തർ എയർവെയ്സിന്റെ ബിഡ് ഓസ്‌ട്രേലിയൻ ഗതാഗത മന്ത്രി കാതറിൻ കിംഗ് കഴിഞ്ഞ മാസം നിരസിച്ചിരുന്നു. ഇതിന് പിന്നാലെ,വിമാന സർവീസുകൾ വർധിപ്പിക്കണമെന്ന ആവശ്യം നിരസിക്കാനുള്ള കാരണങ്ങൾ രേഖാമൂലം വിശദീകരിക്കാനും ഓസ്‌ട്രേലിയൻ അധികൃതർ തയാറായിട്ടില്ല.
'വളരെ അന്യായവും ആശ്ചര്യകരവുമായ നടപടിയാണ് ഇതെന്നും കോവിഡ് സമയത്ത് ഓസ്‌ട്രേലിയക്കാരെ തിരിച്ചയക്കുന്നതിൽ ഖത്തർ എയർവേയ്‌സ് നിർണായക പങ്കാണ് വഹിച്ചിരുന്നതെന്നും ഖത്തർ എയർവേയ്‌സ് സിഇഒ അക്ബർ അൽ ബേക്കർ പ്രതികരിച്ചു. ഇന്നലെ (ശനിയാഴ്ച) സിഎൻഎന്നിന് നൽകിയ പ്രത്യേക അഭിമുഖത്തിലാണ് അദ്ദേഹം ഇക്കാര്യത്തിലുള്ള തന്റെ പ്രതികരണം അറിയിച്ചത്.
അതേസമയം, ഖത്തർ എയർവേയ്‌സിന്റെ ബിഡ് നിരസിച്ച നടപടിയിൽ ഓസ്‌ട്രേലിയൻ സർക്കാർ രൂക്ഷമായ വിമർശനങ്ങളാണ് നേരിട്ടത്. ഓസ്‌ട്രേലിയൻ സർക്കാരിന്റെ വിവാദ തീരുമാനത്തിന് പിന്നിലെ കാരണങ്ങളെക്കുറിച്ച്‌ സെനറ്റ് കമ്മിറ്റിയുടെ അന്വേഷണം ചൊവ്വാഴ്ച ആരംഭിക്കുമെന്നാണ് റിപ്പോർട്ട്.
ദോഹ ഹമദ് രാജ്യാന്തര വിമാനത്താവളത്തിൽ ഓസ്‌ട്രേലിയൻ വനിതാ യാത്രക്കാരെ ദേഹപരിശോധന നടത്തിയത് ഉൾപെടെ, ദേശീയ താൽപര്യം സംരക്ഷിക്കുന്നതിലുള്ള ആശങ്കകൾ ഖത്തറിന്റെ ആവശ്യം നിരസിക്കാനുള്ള കാരണമായതായി ഓസ്‌ട്രേലിയൻ മന്ത്രി കിംഗ് നേരത്തെ ചൂണ്ടിക്കാട്ടിയിരുന്നു..
ന്യൂസ്‌റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/G3GYQhfaTLoDVK1Qr9fc5G
