August 12, 2023
August 12, 2023
ന്യൂസ്‌റൂം ബ്യുറോ
തിരുവനന്തപുരം: കേരളത്തില്‍ നിന്ന് ആറു വര്‍ഷത്തിനിടയിൽ പെണ്‍കുട്ടികള്‍ ഉള്‍പ്പെടെ 43,272 സ്ത്രീകളെ കാണാതായതായി ദേശീയ ക്രൈം റെക്കോര്‍ഡ്‌സ് ബ്യൂറോ (എന്‍. സി. ആര്‍. ബി) റിപ്പോർട്ട് ചെയ്തു. അതേ സമയം, ഇവരിൽ 40,450 (93%) പേരെ അന്വേഷണത്തില്‍ കണ്ടെത്താൻ സാധിച്ചിട്ടുണ്ടെന്നും എന്‍. സി. ആര്‍. ബി വ്യക്തമാക്കി.
2016 മുതല്‍ 2021 വരെയുള്ള കണക്കുകളാണ് ഇപ്പോൾ പുറത്തുവിട്ടത്. ഈ കാലയളവിൽ കാണാതായവരില്‍ 2822 സ്ത്രീകളെ ഇനിയും കണ്ടെത്തിയിട്ടില്ലെന്നും റിപ്പോര്‍ട്ടില്‍ പറയുന്നുണ്ട്. 37,367 പ്രായപൂര്‍ത്തിയായ സ്ത്രീകളെയും, 5905 പെണ്‍കുട്ടികളെയുമാണ് കാണാതായത്. ഇതില്‍ 34,918 സ്ത്രീകളെയും 5532 കുട്ടികളെയും കണ്ടെത്തിയിട്ടുണ്ടെന്നും അധികൃതർ അറിയിച്ചു.
2018ലാണ് കൂടുതല്‍ പെണ്‍കുട്ടികളെ കാണാതായതെന്നാണ് റിപ്പോർട്ട്. 2018ൽ മാത്രം 1136 പെണ്‍കുട്ടികളെയാണ് കേരളത്തിൽ നിന്ന് കാണാതായത്. കൂടുതല്‍ സ്ത്രീകളെ (8202 സ്ത്രീകൾ) കാണാതായത് 2019ല്‍ ആണെന്നും കണക്കുകളിൽ സൂചിപ്പിക്കുന്നു.ഓരോ വര്‍ഷവും ഏകദേശം 984 പെണ്‍കുട്ടികളെയും 6227 സ്ത്രീകളെയും കാണാതാവുന്നുണ്ടെന്നാണ് എന്‍.സി.ആര്‍.ബി പറയുന്നത്.
ന്യൂസ്‌റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/DoTp5mITouhJcwHKcDKLsm
