October 19, 2023
October 19, 2023
ന്യൂഡൽഹി - ചുവപ്പും പച്ചയും നിറത്തിലുള്ള സാരിയണിഞ്ഞ് ഇസ്രായില്‍ - ഫലസ്തീന്‍ യുദ്ധത്തെക്കുറിച്ച് ചര്‍ച്ച നടത്തിയ അവതാരകയോട് രോഷം പ്രകടിപ്പിച്ച് ഇസ്രയേലി പാനലിസ്റ്റ്. ടൈംസ് ഓഫ് ഇന്ത്യയുടെ ഇംഗ്ലീഷ് ടി വി ചാനലായ മിറര്‍ നൗ നടത്തിയ ചര്‍ച്ചയിലാണ് സംഭവം. മിറര്‍ നൗ എക്‌സിക്യൂട്ടിവ് എഡിറ്റര്‍ ശ്രേയ ധൗണ്ഡിയാലായിരുന്നു ചർച്ചയിലെ അവതാരക. ഇതിന്റെ വിഡിയോ സമൂഹമാധ്യമങ്ങളില്‍ വ്യാപകമായി പ്രചരിക്കുന്നുണ്ട്.
ചര്‍ച്ചയില്‍ അവതാരകയുടെ സാരി ചുവപ്പും പച്ചയും നിറത്തിലായത് ഇസ്രായില്‍ പാനലിസ്റ്റ് ഫ്രെഡെറിക്ക് ലാന്‍ഡാവുവിനെ ചൊടിപ്പിക്കുകയായിരുന്നു. ഫലസ്തീന്‍ പതാകയുടെ നിറമുള്ള സാരി അണിഞ്ഞത് ഫലസ്തീനെ പിന്തുണയ്ക്കാനാണെന്ന തരത്തില്‍ ഫ്രെഡെറിക്ക് ആരോപിക്കുകയായിരുന്നു. അതുകൊണ്ടാണ് താന്‍ ഇസ്രായില്‍ പതാകയുടെ നിറമുള്ള നീലയും വെള്ളയും അണിഞ്ഞതെന്നും അദ്ദേഹം പറഞ്ഞു. നീലയും വെള്ളയും എല്ലായ്‌പ്പോഴും വിജയിക്കുമെന്നും ഫ്രെഡെറിക്ക് കൂട്ടിച്ചേർത്തു.
എന്നാല്‍, സാരി തന്റെ മരിച്ചു പോയ മുത്തശ്ശിയുടേതാണെന്നും അതിന്റെ നിറത്തിന് പക്ഷം പിടിയ്ക്കലില്ലെന്നും ശ്രേയ ചാനലിലും തന്റെ എക്സ് (ട്വിറ്റർ) അക്കൗണ്ടിലും വിശദീകരിച്ചു. താന്‍ എന്ത് അണിയണം എന്ത് പറയണം എന്ന് മറ്റുള്ളവരല്ല തീരുമാനിക്കേണ്ടതെന്നും ശ്രേയ വ്യക്തമാക്കി.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/DwYqZdMYXUCGOpYy8tmMSU
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
