December 04, 2023
December 04, 2023
തെൽ അവീവ്: ഖത്തർ, ലെബനൻ, തുർക്കി എന്നിവിടങ്ങളിലെ ഹമാസ് നേതാക്കളെ എത്ര വർഷങ്ങളെടുത്താലും ഇസ്രായേൽ വേട്ടയാടുമെന്ന് ഇസ്രായേലിന്റെ ആഭ്യന്തര സുരക്ഷാ ഏജൻസിയായ ഷിൻ ബെറ്റ് പറഞ്ഞതായി റിപ്പോർട്ട്. ഇന്നലെ (ഞായറാഴ്ച) ഇസ്രായേലിന്റെ പബ്ലിക് ബ്രോഡ്കാസ്റ്റർ 'കാൻ' സംപ്രേഷണം ചെയ്ത റെക്കോർഡിംഗിൽ ആണ് ഷിൻ ബെറ്റ് മേധാവി റോണൻ ബാർ ഈ കാര്യം പറഞ്ഞത്.
"ഹമാസിനെ ഇല്ലാതാക്കാൻ കാബിനറ്റ് ലക്ഷ്യം വെച്ചിട്ടുണ്ട്. ഗസയിലും വെസ്റ്റ് ബാങ്കിലും ലെബനനിലും തുർക്കിയെയിലും ഖത്തറിലും എല്ലായിടത്തും ഞങ്ങൾ ഇത് ചെയ്യും. ഇതിന് കുറച്ച് വർഷങ്ങളെങ്കിലും സമയമെടുക്കും. എന്നാൽ ഞങ്ങൾ അത് ചെയ്യും," റോണൻ ബാർ പറഞ്ഞു.
അതേസമയം, ദോഹയിൽ താമസിക്കുന്ന ഹമാസിന്റെ നേതാക്കളെ ഇസ്രായേൽ വധിക്കില്ലെന്ന് ബെഞ്ചമിൻ നെതന്യാഹു ഖത്തറിന് ഉറപ്പ് നൽകിയതായി റിപ്പോർട്ടുണ്ടായിരുന്നു. ഫ്രഞ്ച് മാധ്യമപ്രവർത്തകൻ ജോർജ്ജ് മാൽബോർനെയെ ഉദ്ധരിച്ച് ഇസ്രായേൽ പത്രമായ ജെറുസലേം പോസ്റ്റാണ് ഇക്കാര്യം റിപ്പോർട്ട് ചെയ്തത്. ഹമാസിന്റെ മുതിർന്ന നേതാക്കളെ വധിക്കാൻ നെതന്യാഹു നേരത്തെ തന്നെ മൊസാദിനോട് ഉത്തരവിട്ടതായി റിപ്പോർട്ടുകൾ വന്നിരുന്നു.
ഇസ്രയേൽ ഹമാസ് സംഘർഷത്തിൽ ബന്ദികളുടെ മോചനത്തിന് മധ്യസ്ഥനായി പ്രവർത്തിക്കുന്നതിന് ഏതാനും ആഴ്ചകൾക്ക് മുമ്പ് തന്നെ ഇസ്രായേലിന് മുമ്പിൽ ഈ ഒരു ആവശ്യം ഖത്തർ ഒരു നിബന്ധനയായി വെച്ചിരുന്നതായാണ് വിവരം.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/CIEQF0ymerI3E7Kl0Fortt
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F