November 26, 2023
November 26, 2023
ഗസ: ഗസയിൽ താൽക്കാലിക വെടിനിർത്തൽ കരാർ നിലനിൽക്കുന്നതിനിടെ ഇസ്രായേൽ സൈന്യം സെൻട്രൽ ഗസയിലെ അൽ-മഗാസി ക്യാമ്പ് ആക്രമിച്ചതായി റിപ്പോർട്ട്. ആക്രമണത്തിൽ ഒരു ഫലസ്തീനി കൊല്ലപ്പെടുകയും മറ്റൊരാൾക്ക് പരിക്കേൽക്കുകയും ചെയ്തതായി അനഡോലു വാർത്ത ഏജൻസി റിപ്പോർട്ട് ചെയ്തിട്ടുണ്ട്.
"വെടിനിർത്തൽ പ്രാബല്യത്തിൽ വന്നിട്ടും, ഇസ്രായേൽ സൈന്യം അൽ-മഗാസി അഭയാർത്ഥി ക്യാമ്പിന് നേരെ ആക്രമണം നടത്തി," പലസ്തീൻ റെഡ് ക്രസന്റ് സൊസൈറ്റി ( പിആർസിഎസ്) പ്രസ്താവനയിൽ പറഞ്ഞു. എന്നാൽ, സംഭവത്തെ കുറിച്ച് ഇസ്രയേൽ പ്രതികരിച്ചിട്ടില്ല. വെടിനിർത്തൽ കരാർ ഇസ്രായേൽ ഒന്നിലധികം തവണ ലംഘിച്ചതായി ഹമാസ് നേരത്തെ ആരോപിച്ചിരുന്നു.
കൂടാതെ, അധിനിവേശ വെസ്റ്റ് ബാങ്കിൽ ഒരു കുട്ടിയടക്കം എട്ട് ഫലസ്തീനികളെ ഇസ്രായേൽ സൈന്യം ഇന്നലെ (ശനി) വധിച്ചതായി ഫലസ്തീൻ ആരോഗ്യ മന്ത്രാലയം അറിയിച്ചു. വെസ്റ്റ് ബാങ്കിലെ ജെനിനിലും ഇസ്രായേൽ നടത്തിയ ആക്രമണത്തിൽ മറ്റ് ആറ് പലസ്തീൻകാർക്ക് പരിക്കേറ്റു. ഇസ്രായേലും ഹമാസും തമ്മിൽ നാല് ദിവസത്തെ വെടിനിർത്തൽ തുടരുന്നതിനിടെയാണ് ഇസ്രയേൽ വെസ്റ്റ്ബാങ്കിൽ റെയ്ഡുകൾ നടത്തിയത്.
അതേസമയം, ഖത്തറിന്റെ മധ്യസ്ഥതയിലുള്ള നാല് ദിവസത്തെ വെടിനിർത്തൽ വെള്ളിയാഴ്ചയാണ് (നവംബർ 24) പ്രാബല്യത്തിൽ വന്നത്. ആദ്യ രണ്ട് ദിവസങ്ങളിൽ നടത്തിയ തടവുകാരുടെ കൈമാറ്റത്തിൽ ഇസ്രായേൽ ജയിലുകളിൽ നിന്ന് 78 ഫലസ്തീനികളെയും, ഹമാസ് ബന്ദികളാക്കിയ 41 ഇസ്രായേലികളെയും വിദേശികളെയും ഫലസ്തീനും മോചിപ്പിച്ചിരുന്നു.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/CIEQF0ymerI3E7Kl0Fortt
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F