October 15, 2023
October 15, 2023
ടെഹ്റാന്: പ്രശസ്ത ഇറാനിയന് ചലച്ചിത്ര സംവിധായകന് ദാരിയൂഷ് മെര്ജൂയിയെയും (83) ഭാര്യ വഹിദയെയും കുത്തിക്കൊലപ്പെടുത്തിയതായി ഇറാനിയന് ഔദ്യോഗിക വാര്ത്ത ഏജന്സി റിപ്പോര്ട്ട് ചെയ്തു. അജ്ഞാതനായ അക്രമി സംവിധായകനെ വീട്ടില് വെച്ച് കൊലപ്പെടുത്തുകയായിരുന്നു എന്ന് ഇറാന് ജുഡീഷ്യറി ഉദ്യോഗസ്ഥനായ ഹൊസൈന് ഫസെലിയെ ഉദ്ധരിച്ച് ഔദ്യോഗിക വാര്ത്താ ഏജന്സിയായ ഐആര്എന്എ റിപ്പോര്ട്ട് ചെയ്തു.
ഇരുവരുടെയും കഴുത്തിലാണ് കുത്തേറ്റത്. ടെഹ്റാനില് നിന്ന് 30 കിലോമീറ്റര് പടിഞ്ഞാറുള്ള വീട്ടിലാണ് ദാരിയൂഷ് മെര്ജൂയിയും ഭാര്യയും താമസിച്ചിരുന്നത്. കഴിഞ്ഞ ദിവസം (ശനിയാഴ്ച) മാതാപിതാക്കളെ സന്ദര്ശിക്കാന് എത്തിയ ദമ്പതികളുടെ മകള് മോണ മെര്ജൂയിയാണ് ഇവര് കൊല്ലപ്പെട്ടത് ആദ്യം കണ്ടത്.
അതേസമയം, തങ്ങള്ക്ക് ഭീഷണിയുണ്ടെന്ന് കൊല്ലപ്പെട്ട വഹിദ സോഷ്യല് മീഡിയയില് പറഞ്ഞതായും റിപ്പോര്ട്ടുണ്ട്. പൊലീസ് അന്വേഷണം ആരംഭിച്ചു.
1970 കളുടെ തുടക്കത്തില് ഇറാനിലെ നവതരംഗ സിനിമ പ്രസ്ഥാനത്തിലെ പ്രധാന വ്യക്തിയായിരുന്നു മെര്ജൂയി. റിയലിസ്റ്റിക്ക് ശൈലിയിലായിരുന്നു ഇദ്ദേഹത്തിന്റെ ചിത്രങ്ങള്. 1998 ലെ ചിക്കാഗോ ഇന്റര്നാഷണല് ഫിലിം ഫെസ്റ്റിവലില് നിന്ന് സില്വര് ഹ്യൂഗോയും, 1993 ലെ സാന് സെബാസ്റ്റ്യന് ഇന്റര്നാഷണല് ഫിലിം ഫെസ്റ്റിവലില് ഗോള്ഡന് സീഷെലും ഉള്പ്പെടെ നിരവധി അവാര്ഡുകള് അദ്ദേഹത്തിന് ലഭിച്ചു. 2015ല് കേരള അന്താരാഷ്ട്ര ചലച്ചിത്രോത്സവത്തില് സമഗ്ര സംഭവാനയ്ക്കുള്ള അവാര്ഡും നേടിയിട്ടുണ്ട്.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/DwYqZdMYXUCGOpYy8tmMSU