February 22, 2024
February 22, 2024
തിരുവനന്തപുരം: സംസ്ഥാനത്തെ ഡ്രൈവിങ് ടെസ്റ്റ് പരിഷ്‌കരിച്ച് മോട്ടോര്‍ വാഹന വകുപ്പ് ഉത്തരവിറക്കി. ഇരുചക്ര വാഹനങ്ങളുടെ ടെസ്റ്റിന് കാലില്‍ ഗിയറുള്ള വാഹനം ഉപയോഗിക്കണം. കാര്‍ ലൈസന്‍സിന് ഓട്ടോമാറ്റിക് ഗിയറുള്ള കാറിന് പകരം ഗിയറുള്ള കാര്‍ ഉപയോഗിച്ച് ടെസ്റ്റ് നടത്തണമെന്നും പുതിയ സര്‍ക്കുലറില്‍ പറയുന്നു. 15 വര്‍ഷത്തില്‍ കൂടുതല്‍ പഴക്കമുള്ള വാഹനങ്ങള്‍ ടെസ്റ്റിന് ഉപയോഗിക്കാന്‍ പാടില്ലെന്നും നിര്‍ദേശമുണ്ട്. 2024 മെയ് ഒന്ന് മുതല്‍ പുതിയ നിയമം പ്രാബല്യത്തില്‍ വരും.
വാഹനങ്ങളുടെ റോഡ് ടെസ്റ്റ് റോഡില്‍ തന്നെ നടത്തണം. ടെസ്റ്റ് കേന്ദ്രങ്ങളില്‍ തന്നെ റോഡ് ടെസ്റ്റ് നടത്തുന്നത് നിയമ വിരുദ്ധമാക്കും. വിവിധ തരത്തില്‍ വാഹനം പാര്‍ക്ക് ചെയ്യാനുള്ള പരിശോധനയും പുതിയ നിയമത്തില്‍ കര്‍ശനമാക്കി. ഡ്രൈവിംഗ് സ്‌കൂളുകളുടെ കാറുകള്‍ക്ക് ഡാഷ് ക്യാമറയും നിര്‍ബന്ധമാക്കി. ഇരുചക്രവാഹനങ്ങളുടെ ടെസ്റ്റും ക്യാമറയില്‍ റെക്കോര്‍ഡ് ചെയ്ത് സൂക്ഷിക്കണം. ലൈസന്‍സ് ടെസ്റ്റിന് ശേഷം ക്യാമറയുടെ മെമ്മറി കാര്‍ഡ് വാങ്ങി ബന്ധപ്പെട്ട ഉദ്യോഗസ്ഥന്‍ വീഡിയോ സേവ് ചെയ്ത് സൂക്ഷിക്കണമെന്നും പുതിയ സര്‍ക്കുലര്‍ വ്യക്തമാക്കി.
ട്രാന്‍സ്പോര്‍ട്ട് കമ്മീഷണര്‍ അധ്യക്ഷനായ സമിതിയുടെ നിര്‍ദേശത്തിന്റെ അടിസ്ഥാനത്തിലാണ് തീരുമാനം. ഡ്രൈവിങ് ടെസ്റ്റ് നടത്തേണ്ട അപേക്ഷകരുടെ എണ്ണം 30 ആയും നിജപ്പെടുത്തി. ഇരുപത് പുതിയ അപേക്ഷകരും പത്ത് നേരത്തെ പരാജയപ്പെട്ടവരുമായാണ് എണ്ണം നിജപ്പെടുത്തിയത്. ലേണേഴ്സ് ടെസ്റ്റിന് അപേക്ഷിക്കുന്നവരുടെ എണ്ണം ഇതനുസരിച്ച് നിജപ്പെടുത്തണം. 30ല്‍ കൂടുതല്‍ പേര്‍ക്ക് ടെസ്റ്റ് നടത്തിയാല്‍ ഉദ്യോഗസ്ഥനെതിരെ നടപടി സ്വീകരിക്കുമെന്നും പുതിയ ഉത്തരവില്‍ പറയുന്നു.
ന്യൂസ്റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/IocT7PQnr4MEYpMCPpqwIn
ന്യൂസ്റൂം വാട്‌സ്ആപ്പ് ചാനലില്‍ ജോയിന്‍ ചെയ്യുക - https://whatsapp.com/channel/0029Va9k1sH3rZZiZHLfLm0F
