October 17, 2023
October 17, 2023
ഗസ: ഇസ്രയേല് വ്യോമാക്രമണത്തില് കൊല്ലപ്പെട്ട ഗസ നിവാസികളുടെ മൃതദേഹങ്ങൾ സൂക്ഷിച്ചിരിക്കുന്നത് ഐസ്ക്രീം ട്രക്കുകളില്. മോര്ച്ചറികൾ മൃതദേഹങ്ങൾ കൊണ്ട് നിറഞ്ഞിരിക്കുകയാണ്. മൃതദേഹങ്ങള് സംസ്കരിക്കാന് സ്ഥലമില്ലാത്തതിനാലാണ് ഐസ് ക്രീം ട്രക്കുകളില് മൃതദേഹങ്ങള് സൂക്ഷിക്കാന് ആരോഗ്യ മന്ത്രാലയം അധികൃതര് തീരുമാനിച്ചത്.
നിലവിലെ സാഹചര്യത്തിൽ ആശുപത്രി മോര്ച്ചറികളില് 10 മൃതദേഹങ്ങള് വരെ മാത്രമേ സൂക്ഷിക്കാന് കഴിയൂ. അതിനാല് ഐസ്ക്രീം ഫാക്ടറികളില് നിന്ന് ഐസ്ക്രീം ഫ്രീസറുകള് കൊണ്ടുവന്നിട്ടുണ്ടെന്ന് ഗസയിലെ ഷുഹാദ അല് അഖ്സ ആശുപത്രിയിലെ ഡോക്ടര് യാസര് അലി പറഞ്ഞു.
ഐസ്ക്രീം നുണയുന്ന പുഞ്ചിരിക്കുന്ന കുട്ടികളുടെ ചിത്രങ്ങളുള്ള ട്രക്കുകളാണ് ഗസയിൽ താൽക്കാലിക മോര്ച്ചറികളായി മാറിയിരിക്കുന്നത്. സാധാരണയായി സൂപ്പര്മാര്ക്കറ്റുകളില് ഐസ്ക്രീം എത്തിക്കാനാണ് ഈ ട്രക്കുകള് ഉപയോഗിക്കുന്നത്.
അതേസമയം, ഐസ്ക്രീം ട്രക്കുകളും മൃതദേഹങ്ങൾ കൊണ്ട് നിറഞ്ഞതോടെ മുപ്പതോളം മൃതദേഹങ്ങള് ടെന്റുകളില് സൂക്ഷിച്ചിരിക്കുകയാണെന്ന് ഡോക്ടര് അലി പറഞ്ഞതായി റോയിട്ടേഴ്സ് റിപ്പോര്ട്ട് ചെയ്തിട്ടുണ്ട്. ഗസ സിറ്റിയില് മൃതദേഹങ്ങളുടെ കൂട്ട സംസ്കാരം നടത്താനുള്ള സംവിധാനം ഒരുക്കുമെന്ന് മീഡിയ ഓഫീസ് മേധാവി സലാമ മറൂഫ് പറഞ്ഞു.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/DwYqZdMYXUCGOpYy8tmMSU