September 14, 2023
September 14, 2023
ദോഹ : നിപ സ്ഥിരീകരിച്ചതിനെ തുടർന്ന് നാട്ടിലേക്ക് പോകാനിരുന്ന കോഴിക്കോട് ജില്ലയിൽ നിന്നുള്ള പ്രവാസികൾ യാത്ര മാറ്റിവെക്കുന്നതായി റിപ്പോർട്ട്.അടുത്ത ദിവസങ്ങളിൽ നാട്ടിലേക്ക് പോകാനിരുന്ന പലരും കാര്യങ്ങൾ ഉടൻ നിയന്ത്രണ വിധേയമായില്ലെങ്കിൽ എന്ത് ചെയ്യുമെന്നറിയാതെ വിഷമിക്കുകയാണ്.
കോഴിക്കോട് ജില്ലയിലെ വടകര,വില്യാപ്പള്ളി,ആയഞ്ചേരി,കുറ്റിയാടി ഭാഗങ്ങളിൽ മിക്ക പ്രദേശങ്ങളും കണ്ടെയ്‌ൻമെൻറ് സോണുകളായി പ്രഖ്യാപിച്ചിട്ടുണ്ട്..അതുകൊണ്ടുതന്നെ നാട്ടിലേക്ക് പോയാലും വീട്ടിൽ നിന്ന് പുറത്തിറങ്ങി കാര്യങ്ങളൊന്നും ചെയ്യാൻ കഴിയാത്ത സാഹചര്യമായിരിക്കും.ഇതിന് പുറമെ,സ്ഥിതിഗതികൾ എളുപ്പത്തിൽ നിയന്ത്രിക്കാൻ കഴിയാത്ത അവസ്ഥയുണ്ടായാൽ ഗൾഫിലേക്കുള്ള തിരിച്ചുവരവും പ്രതിസന്ധിയിലാകും.നേരത്തെ കോവിഡ് കാലത്തുണ്ടായ അനുഭവങ്ങൾ ആവർത്തിച്ചേക്കുമോ എന്ന ആശങ്കയും പലരും പങ്കുവെക്കുന്നുണ്ട്.
ഇതിനിടെ, നിപ ജാഗ്രത മുൻകരുതലിന്‍റെ ഭാഗമായി കോഴിക്കോട് ജില്ലയിലെ വിദ്യാഭ്യാസ സ്ഥാപനങ്ങൾക്ക് മറ്റന്നാളും (16-9-23) അവധി പ്രഖ്യാപിച്ചു. പ്രൊഫഷണൽ കോളേജുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും (അങ്കണവാടി,മദ്രസകൾ ഉൾപ്പെടെ) അവധി ബാധകമായിരിക്കും. ജില്ലയില്‍ നേരത്തെ ഇന്നും നാളെയുമാണ് (14.09.2023, 15.09.2023) അവധി പ്രഖ്യാപിച്ചിരുന്നത്. ജില്ലയിൽ അടുത്ത പത്ത് ദിവസത്തേക്ക് നടത്താൻ നിശ്ചയിച്ചിരിക്കുന്ന എല്ലാ പൊതു പരിപാടികളും താല്ക്കാലികമായി നിർത്തിവയ്ക്കുവാനും ജില്ലാ കളക്ടർ എ ഗീത ഉത്തരവിട്ടിട്ടുണ്ട്.
ഈ സാഹചര്യത്തിൽ,ഒഴിച്ചുകൂടാനാവാത്ത കാരണങ്ങളുണ്ടെങ്കിൽ മാത്രം ഗൾഫിൽ നിന്നുള്ള പ്രവാസികൾ നാട്ടിലേക്കുള്ള യാത്രകൾ മാറ്റിവെക്കുന്നതായിരിക്കും ഉചിതം.
ന്യൂസ്‌റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/G3GYQhfaTLoDVK1Qr9fc5G
