July 30, 2021
July 30, 2021
ജിദ്ദ:നീണ്ട യാത്രാ വിലക്കിനും കോവിഡ് പ്രതിസന്ധികളും മറികടന്ന് പ്രവാസി മലയാളി സൗദിയിലെത്തി. പ്രതിസന്ധിക്കാലത്ത് ഖത്തര്‍ വഴി സൗദിയിലേക്ക് എത്തുന്ന ആദ്യ മലയാളി കോഴിക്കോട് മുക്കം ചേന്ദമംഗലൂര്‍ സ്വദേശി ജംഷീദ് റഹ്‌മാനാണ്. ദോഹയില്‍ നിന്ന് ജിദ്ദയിലേക്കാണ് ഇദ്ദേഹം കഴിഞ്ഞ ദിവസം എത്തിയത്. കഴിഞ്ഞ 14ാം തിയതിയാണ് ഇദ്ദേഹം ഓണ്‍ അറൈവല്‍ വിസയില്‍ ഖത്തറിലിറങ്ങിയത്. ദോഹയിലെ പതിനാല് ദിവസത്തെ ക്വാറന്റീന്‍ പൂര്‍ത്തിയാക്കിയ ശേഷമാണ് കഴിഞ്ഞ ദിവസം ജംഷീദ് ജിദ്ദ വിമാനത്താവളത്തില്‍ ഇറങ്ങിയത്.
യാത്രക്ക് 72 മണിക്കൂര്‍ മുന്‍പ് പി.സി.ആര്‍ നെഗറ്റിവ് സര്‍ട്ടിഫിക്കറ്റു നേടിയിരുന്നു. കൂടാതെ മുഖീം പോര്‍ട്ടില്‍ റെജിസ്റ്റര്‍ചെയ്യുകയും തവക്കല്‍നാ ആപ്പിള്‍ കോവിഡ് വാക്സിനേഷന്‍ പൂര്‍ത്തീകരിച്ചത് അപ്‌ഡേറ്റ് ചെയ്യുകയും ചെയ്തു. തവക്കല്‍നയില്‍ ഇമ്മ്യുന്‍ സ്റ്റാറ്റസ് അപ്‌ഡേറ്റ് ചെയ്തിരുന്നതിനാല്‍ നിര്‍ബന്ധിത ക്വാറന്റീന്‍ ഇല്ലാതെ റൂമില്‍ എത്താന്‍ ഇദ്ദേഹത്തിന് കഴിഞ്ഞു.നിലവില്‍ ആയിരകണക്കിന് സൗദി പ്രവാസികളാണ് ഖത്തര്‍ വഴി യാത്രയ്ക്കായി ദോഹയില്‍ ഉള്ളത്.
