February 01, 2023
February 01, 2023
ന്യൂസ്റൂം ബ്യുറോ
ദോഹ : വർഷങ്ങളായി തുടരുന്ന അഭിപ്രായ ഭിന്നതകൾക്കു ശേഷം ഖത്തറിനും ബഹ്റൈനുമിടയിൽ സമവായത്തിന് വഴിയൊരുങ്ങുന്നു.ഇതിന്റെ ഭാഗമായി ഇരു രാജ്യങ്ങൾക്കുമിടയിൽ വിമാന സര്വീസുകള് ഉടന് പുനഃരാരഭിക്കും. രാജ്യങ്ങള് തമ്മിലുള്ള ബന്ധം കൂടുതല് മെച്ചപ്പെടുത്തുന്നതിന്റെ ഭാഗമായാണു തീരുമാനം.
വിമാന സര്വീസുകള് ഉടന് പുനരാരംഭിക്കുമെന്ന പ്രഖ്യാപനം ബഹ്റൈന് ഗതാഗത, ടെലികമ്മ്യൂണിക്കേഷന് മന്ത്രി മുഹമ്മദ് അല് കഅബിയാണറിയിച്ചത്. ഇരു രാജ്യങ്ങളിലെയും സിവില് ഏവിയേഷന് അധിക്യതര് തമ്മില് ഇക്കാര്യത്തില് ആശയവിനിമയം നടത്തി ധാരണയിലെത്തിയതായി പാര്ലമെന്റിന്റെ പ്രതിവാര സെഷനില് അദ്ദേഹം എംപിമാരോട് പറഞ്ഞു. ഇരു രാജ്യങ്ങളിലെയും ജനതക്ക് ഏറെ സന്തോഷം പകരുന്നതാണു വിമാന സര്വീസ് പുനരാരംഭിക്കാനുള്ള തീരുമാനം.
ഇരു രാജ്യങ്ങളും തമ്മില് ബന്ധം ഊഷ്മളമാക്കുന്നതിന്റെ ഭാഗമായി ബഹ്റൈന് കിരീടാവകാശിയും പ്രധാന മന്ത്രിയുമായ പ്രിന്സ് സല്മാന് ബിന് ഹമദ് അല് ഖലീഫയും ഖത്തര് അമീര് ശൈഖ് തമീം ബിന് ഹമദ് അല് താനിയും ഈയിടെ ടെലിഫോണ് സംഭാഷണം നടത്തിയിരുന്നു. ഇരു രാജ്യത്തെയും ജനങ്ങള് തമ്മിലുള്ള സാഹോദര്യ ബന്ധം ചൂണ്ടിക്കാട്ടിയ കിരീടാവകാശി, പ്രശ്നങ്ങള് പരിഹരിച്ചു മുന്നോട്ട് പോകേണ്ടതിന്റെ പ്രാധാന്യവും എടുത്തു പറഞ്ഞു.ജനങ്ങളുടെ അഭിലാഷങ്ങള് നിറവേറ്റാനും ജി.സി.സിയുടെ ഐക്യവും മേഖലയുടെ സുരക്ഷിതത്വവും നിലനിര്ത്താനും ഇത് ആവശ്യമാണെന്നും അദ്ദേഹം ചൂണ്ടിക്കാട്ടി. ഇരു രാജ്യങ്ങളിലെയും ഉദ്യോഗസ്ഥ തലത്തിലുള്ള കൂടിയാലോചനകള് തുടരാനും ചര്ച്ചയില് ധാരണയായി.
ന്യൂസ്റൂം വാർത്തകളും തൊഴിൽ അറിയിപ്പുകളും മുടങ്ങാതെ ലഭിക്കാൻ https://chat.whatsapp.com/CZ8evyItpDFGmuyTIzjnaL എന്ന ലിങ്കിൽ ജോയിൻ ചെയ്യുക