July 04, 2023
July 04, 2023
ന്യൂസ്റൂം ബ്യുറോ
തിരുവനന്തപുരം: കുഞ്ഞുങ്ങളുടെ കുരുന്ന് ജീവനും പിഞ്ച് ഹൃദയവും വെച്ച് വ്യാജവാര്ത്ത ചമയ്ക്കരുതെന്ന് ആരോഗ്യമന്ത്രി വീണ ജോര്ജ്. ‘ഹൃദ്യം പദ്ധതിയില് വന്കിട സ്വകാര്യ ആശുപത്രികള്ക്ക് മുന്ഗണന ഉണ്ടായിരുന്നുവെന്ന വാര്ത്ത പുറത്തുവിട്ട റിപ്പോര്ട്ടര് ചാനലിനെ പേരെടുത്ത് വിമര്ശിക്കാതെയാണ് മന്ത്രി ഫേസ്ബുക്കിലൂടെ ഈ വിമര്ശനം ഉന്നയിച്ചത്.
വ്യാജ വാര്ത്തകള് നല്കി ദുര്ബലമായ കുഞ്ഞു ഹൃദയങ്ങളുടെ തുടിപ്പുകള് നിര്ത്താമെന്ന് ആരും കരുതേണ്ടെന്നും മീഡിയ ആക്ടിവിസം അല്ല മീഡിയ വാന്ഡലിസം ആണ് നടക്കുന്നതെന്നും മന്ത്രി വിമര്ശിച്ചു. പിഞ്ച് കുഞ്ഞുങ്ങളുടെ ജീവന് വെച്ച് വ്യാജ വാര്ത്ത നല്കിയാല് താന് പേടിച്ചോടുമെന്ന് കരുതേണ്ടെന്നും കൂടുതല് ആര്ദ്രതയോടെ കരുത്തോടെ ആ കുരുന്നു ജീവനുകള് സര്ക്കാര് ചേര്ത്ത് പിടിക്കുമെന്നും മന്ത്രി കൂട്ടിച്ചേര്ത്തു.
കുഞ്ഞു ഹൃദയങ്ങളുടെ തുടിപ്പുകള് നിര്ത്താന് ഒരു ദുഷ്ട മനസിനെയും അനുവദിക്കില്ലെന്നും
ആ കുരുന്നു നാളങ്ങള് അണയാതെ കഴിയുന്നത്ര സംരക്ഷിക്കുമെന്നും മന്ത്രി കുറിച്ചു. ഹൃദ്യം പദ്ധതിയെക്കുറിച്ചും വിശദമായ കുറിപ്പെഴുതിയ ആരോഗ്യമന്ത്രി, ഇവിടെ എഴുതിയതൊക്കെ വാര്ത്താ ‘ഇംപാക്ട്’ എന്ന വ്യാജം കൂടി ചേര്ത്ത് നല്കാതിരിക്കണമെന്നും വിമര്ശിച്ചു.
ഇപ്പോഴത്തെ ഈ ചാനല് പ്രവര്ത്തനം ആരംഭിക്കുന്നതിന് വളരെ വളരെ മുമ്പേ സര്ക്കാരിന്റെ ഈ പ്രവര്ത്തനങ്ങളൊക്കെ ആരംഭിക്കുകയും തുടര്ന്നു പോരുകയും ചെയ്യുന്നതാണെന്നും മന്ത്രി പറഞ്ഞു. ഇന്റര്വെഷന് ആവശ്യമായി വരുന്ന കുട്ടികളുടെ എണ്ണത്തിനനുസരിച്ച് സൗകര്യങ്ങള് ഒരുക്കി സര്ക്കാര് ആശുപത്രികളെ കൂടുതല് ശാക്തീകരിക്കുകയാണ് സര്ക്കാര് ലക്ഷ്യമെന്നും ഇത് ഹൃദ്യത്തിന്റെ തുടക്കത്തില് തന്നെ പ്രഖ്യാപിക്കപ്പെട്ടിട്ടുണ്ടെന്നും മന്ത്രി വ്യക്തമാക്കി.
മന്ത്രി വീണാ ജോര്ജിന്റെ ഫേസ്ബുക്ക് പോസ്റ്റിന്റെ പൂർണരൂപം :
കുഞ്ഞുങ്ങളുടെ കുരുന്നുജീവനും പിഞ്ചു ഹൃദയവും വെച്ച് വ്യാജവാര്ത്ത ചമയ്ക്കരുത്.
പിഞ്ചുകുഞ്ഞുങ്ങളെ മരണത്തില് നിന്നും രക്ഷിക്കാനും ഗുരുതര രോഗാവസ്ഥയില് നിന്ന് മോചിപ്പിക്കാനുമുള്ള നമ്മുടെ ഏറ്റവും പ്രധാനപ്പെട്ട പദ്ധതികളില് ഒന്നാണ് ‘ഹൃദ്യം’. Congenital heart disease അഥവാ ജന്മനായുള്ള ഹൃദ്രോഗങ്ങളെ സൗജന്യമായി ചികിത്സിച്ച് ഭേദമാക്കാനുള്ള പദ്ധതിയാണിത്. ജനിക്കുന്ന ആയിരം കുഞ്ഞുങ്ങളില് എട്ടോ ഒന്പതോ പേര് ജന്മനാ ഹൃദയ വൈകല്യങ്ങള് ഉള്ളവരാണ്.
ജന്മനായുള്ള ഹൃദ്രോഗങ്ങള് ചെറിയ ഹൃദയ വൈകല്യങ്ങള് മുതല് അത്യന്തം സങ്കീര്ണമായിട്ടുള്ള രോഗങ്ങള് വരെയാകാം. ജനിച്ച് മണിക്കൂറുകള്ക്കോ ദിവസങ്ങള്ക്കോ അല്ലെങ്കില് ഏറ്റവും കുറഞ്ഞ സമയപരിധിക്കുള്ളിലോ ശസ്ത്രക്രിയ നടത്തി പരിഹരിച്ചില്ലെങ്കില് കുഞ്ഞുങ്ങളുടെ ജീവന് നഷ്ടപ്പെട്ടു പോകുന്ന ഗുരുതര രോഗങ്ങളുമുണ്ട്. ശ്വാസതടസം മൂലം അമ്മയുടെ നെഞ്ചിലെ മുലപ്പാല് പോലും നുകരാന് കഴിയാതെ മരണത്തിലേക്ക് പോകുന്ന കുഞ്ഞുങ്ങളുമുണ്ട്.
ന്യൂസ്റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക https://chat.whatsapp.com/GjQM19221WxKnWo2cdbsZe