June 07, 2023
June 07, 2023
ന്യൂസ്‌റൂം ബ്യുറോ
ദോഹ: മെയ് അവസാനം ഖത്തറില്‍ വാഹനാപകടത്തില്‍ മരിച്ച മലപ്പുറം കൊണ്ടോട്ടി സ്വദേശി അലി പുളിക്കലിന്റെ മക്കളുടെ സംരക്ഷണം മര്‍കസ് ഏറ്റെടുത്തു.
അലിയുടെ മരണത്തെ തുടര്‍ന്ന് അനാഥരായ എട്ട് കുരുന്നുകളെയാണ് മര്‍കസ് ജനറല്‍ സെക്രട്ടറി കാന്തപുരം എ.പി. അബൂബക്കര്‍ മുസ്‌ലിയാരുടെ പ്രത്യേക നിര്‍ദേശത്തെ തുടര്‍ന്ന് ഓര്‍ഫൻ കെയര്‍ സ്‌കീമില്‍ ഉള്‍പ്പെടുത്തി ഏറ്റെടുത്തത്. ഖത്തര്‍ ഐ.സി.എഫ്, മര്‍കസ് കമ്മിറ്റികളാണ് ഈ വിഷയം കാന്തപുരത്തിന്റെ ശ്രദ്ധയില്‍ പെടുത്തിയത്.
സ്വന്തം വീടുകളില്‍ മാതാക്കളുടെ സംരക്ഷണത്തില്‍ താമസിപ്പിച്ച്‌ പഠനം, ഭക്ഷണം, മറ്റു അനുബന്ധ ചെലവുകള്‍ എന്നിവ മര്‍കസ് വഹിക്കുന്ന ഈ പദ്ധതിക്ക് കീഴില്‍ രാജ്യവ്യാപകമായി 12,000 ലധികം അനാഥ കുരുന്നുകള്‍ പഠിക്കുന്നുണ്ട്.
ആശിര്‍ ഹസൻ (14 വയസ്സ്), ആരിഫ്(11 വയസ്സ്), അശ്ഫാഖ്(11), ഫാത്തിമ ഫര്‍ഹ (9), ലിഹ ഫരീഹ (9), അശ്മില്‍ ഹിദാശ്(8), മുഹമ്മദ് ഹമ്മാദ്(7), ഖദീജ ഹന്ന(5) എന്നിവരുടെ സംരക്ഷണമാണ് മര്‍കസ് ഏറ്റെടുത്തത്. മര്‍കസ് ഡയറക്ടര്‍ ജനറല്‍ സി. മുഹമ്മദ് ഫൈസി പരേതന്റെ വീട് സന്ദര്‍ശിച്ചു.
ഇതുവരെ ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/EbsrZk47eaBENKOhwtWeGf
