January 16, 2022
January 16, 2022
ടോംഗോ : പസഫിക് സമുദ്രത്തിൽ ഉണ്ടായ അഗ്നിപർവത സ്ഫോടനത്തിന്റെ ഫലമായി ടോംഗോയിൽ സുനാമി. രാജ്യത്ത് ഇന്നലെ മുന്നറിയിപ്പ് പ്രഖ്യാപിച്ചതിന് പിന്നാലെയാണ് സുനാമി ഉടലെടുത്തത്. വാർത്താവിനിമയ സംവിധാനങ്ങൾ തകരാറിലായതിനാൽ അപകടത്തിന്റെ വ്യാപ്തിയെ കുറിച്ച് വിവരങ്ങൾ ലഭ്യമല്ല എന്നത് ആശങ്കയുളവാക്കുന്നുണ്ട്.
ശനിയാഴ്ച്ച വൈകുന്നേരം 6:40 ഓടെയാണ് രാജ്യത്തെ ഇന്റർനെറ്റ്, ഫോൺ സംവിധാനം എന്നിവ പ്രവർത്തനരഹിതമായത്. ഒരുലക്ഷത്തിഅയ്യായിരം പേർ വസിക്കുന്ന ടോംഗോയിൽ കൂറ്റൻ തിരമാലകൾ ഉയരുന്ന ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചിരുന്നു. രാജ്യത്തിന്റെ തലസ്ഥാനമായ നുക്വലോഫയുമായി മാത്രമാണ് ആശയവിനിമയം സാധ്യമായതെന്നും, മറ്റ് വിവരങ്ങൾ ലഭ്യമല്ലെന്നും ന്യൂസിലാന്റ് പ്രധാനമന്ത്രി ജസീന്ത ആർഡൻ അറിയിച്ചു. അയൽ രാജ്യമായതിനാൽ ഏറെ ന്യൂസിലാന്റ് പൗരന്മാർ അധിവസിക്കുന്ന രാജ്യമാണ് ടോംഗോ.
