June 21, 2021
June 21, 2021
ദോഹ:കുടിയേറ്റ തൊഴിലാളികളുടെ മനുഷ്യാവകാശങ്ങള്‍ ലംഘിച്ചെന്നാരോപിച്ച് ഖത്തര്‍ ലോകകപ്പ് ബഹിഷ്‌ക്കരിക്കണമെന്ന വാദം നോര്‍വെ ഫുട് ബോള്‍ ഫെഡറേഷന്‍ തള്ളി. ഞായറാഴ്ച ചേര്‍ന്ന നോര്‍വീജിയന്‍ ഫുട്ബോള്‍ ഫെഡറേഷന്റെ അസാധാരണ യോഗത്തിലാണ് തീരുമാനം.ഫെഡറേഷനിലെ 368 അംഗങ്ങള്‍ ലോകകപ്പ് ബഹിഷ്‌കരിക്കണമെന്ന ആവശ്യത്തെ എതിര്‍ത്തു. 121 അംഗങ്ങളാണ് അനുകൂലിച്ചത്. ഖത്തറിലെ ലോകകപ്പില്‍ കളിക്കുന്നത് സെമിത്തേരിയില്‍ കളിക്കുന്നതിന് തുല്യമാണെന്ന ആരോപണം പോലും എതിരാളികള്‍ ഉയര്‍ത്തിയിരുന്നു. ഖത്തറില്‍ മനുഷ്യാവകാശ ലംഘനങ്ങള്‍ നടക്കുന്നുവെന്ന് ചൂണ്ടിക്കാട്ടിയാണ് ഇത്തരം സംഘങ്ങളുടെ ബഹിഷ്‌കരണാഹ്വാനം. 2000ലെ യൂറോ കപ്പിന് ശേഷം പ്രധാനപ്പെട്ട ഒരു ഫുട്ബോള്‍ ടൂര്‍ണമെന്റിലേക്കും നോര്‍വെ ദേശീയ ടീം യോഗ്യത നേടിയിട്ടില്ലെന്നതാണ് രസാവഹമായ മറ്റൊരു കാര്യം. നിലവില്‍ ലോകകപ്പ് യോഗ്യത മത്സരത്തില്‍ ഗ്രൂപ്പില്‍ നാലാം സ്ഥാനത്താണ് നോര്‍വെ.
