July 07, 2021
July 07, 2021
ദോഹ: സമാധാന സംഭാഷണങ്ങള്ക്കും സൈനിക പിന്മാറ്റത്തിനുമിടെ അഫ്ഗാന് നയതന്ത്രജ്ഞരുമായി മുതിര്ന്ന ഖത്തരി പ്രതിനിധികള് കൂടിക്കാഴ്ച നടത്തി. കാബൂള് സന്ദര്ശനത്തിനിടെയാണ് ഖത്തറിന്റെ പ്രത്യേക ദൂതന് മുത്ലക് ബിന് മാജീദ് അല് ഖഹ്താനിയും സംഘവുമാണ് അഫ്ഗാന് പ്രതിനിധികളുമായി കൂടിക്കാഴ്ച നടത്തിയത്. അഫ്ഗാനിസ്ഥാന്റെ പ്രഥമ ഉപരാഷ്ട്രപതി അറുല്ല സാലെ, രണ്ടാം ഉപരാഷ്ട്രപതി സര്വര് ദാനിഷ്, വിദേശകാര്യ മന്ത്രി മുഹമ്മദ് ഹനീഫ് അത്മാര് എന്നിവരുമായിട്ടായിരുന്നു കൂടിക്കാഴ്ച.രാജ്യത്തെ രാഷ്ട്രീയ, സുരക്ഷാ സാഹചര്യങ്ങളെക്കുറിച്ചും താലിബാന്റെ ആക്രമണങ്ങള് വര്ധിക്കുന്നതിനെക്കുറിച്ചും നയതന്ത്രജ്ഞര് സംസാരിച്ചുവെന്ന് അഫ്ഗാന് വിദേശകാര്യ മന്ത്രാലയം അറിയിച്ചു. അഫ്ഗാന് സമാധാന പ്രക്രിയയെ പിന്തുണയ്ക്കുന്നതിനുള്ള തങ്ങളുടെ പ്രതിബദ്ധത അല് ഖഹ്താനി ആവര്ത്തിച്ചു.അഫ്ഗാന് സര്ക്കാരും താലിബാനും തമ്മിലുള്ള പതിറ്റാണ്ടുകളുടെ യുദ്ധം അവസാനിപ്പിക്കുമെന്ന പ്രതീക്ഷയിലാണ് കഴിഞ്ഞ സെപ്റ്റംബര് മുതല് ഖത്തറില് സമാധാന ചര്ച്ചകള്ക്ക് സൗകര്യമൊരുക്കിയത്.സെപ്റ്റംബര് 11നു മുമ്പ് അഫ്ഗാനില് നിന്നും വിദേശ സൈന്യങ്ങള് പൂര്ണമായും മാറുകയാണ്. യു.എസിന്റെ 90 ശതമാനം സാനികരും പിന്വാങ്ങിക്കഴിഞ്ഞതായി കഴിഞ്ഞ ദിവസം ബന്ധപ്പെട്ടവര് പ്രഖ്യാപിച്ചിരുന്നു. അതിനിടെ അഫ്ഗാന്റെ നിരവധി പ്രദേശങ്ങള് ഇപ്പോള് തന്നെ താലിബാന്റെ നിയന്ത്രണത്തിലായിട്ടുണ്ട്.