November 12, 2021
November 12, 2021
ദോഹ : ഖത്തർ വിദേശകാര്യമന്ത്രി ഷെയ്ഖ് മുഹമ്മദ് ബിൻ അബ്ദുറഹ്മാൻ അൽ താനിയും സംഘവും ഇന്ന് വാഷിംഗ്ടണിൽ. ഖത്തർ അമേരിക്ക വാർഷിക ചർച്ചകളുടെ നാലാം പതിപ്പിൽ പങ്കെടുക്കാനായാണ് മന്ത്രി അമേരിക്കയിലേക്ക് തിരിച്ചത്. ഖത്തർ സംഘത്തെ യുഎസ് സ്റ്റേറ്റ് സെക്രട്ടറി ആന്റണി ബ്ലിങ്കൺ സ്വീകരിക്കും.
അമേരിക്കൻ പ്രതിരോധമന്ത്രാലയ പ്രതിനിധികളും, സ്റ്റേറ്റ് സെക്രട്ടറിയും പങ്കെടുക്കുന്ന വാർഷിക ചർച്ചയിൽ തീവ്രവാദത്തെ ചെറുക്കാനുള്ള പദ്ധതികൾ, മനുഷ്യാവകാശലംഘനങ്ങളുമായി ബന്ധപ്പെട്ടുള്ള വിഷയങ്ങൾ, പൊതുജനാരോഗ്യം, കാലാവസ്ഥ, പ്രതിരോധത്തിലെ പരസ്പരധാരണ തുടങ്ങിയ ഒരുപിടി വിഷയങ്ങൾ ചർച്ച ചെയ്യപ്പെടും. ദോഹയുടെ ഏറ്റവും പ്രധാനപ്പെട്ട വിപണനപങ്കാളികളിൽ ഒന്നായാണ് വാഷിംഗ്ടൺ വിലയിരുത്തപ്പെടുന്നത്. 2021 വർഷത്തിന്റെ ആദ്യപകുതിയിൽ 2.5 ബില്യൺ ഡോളറിന്റെ വിവിധ കരാറുകളിലാണ് ഖത്തറും അമേരിക്കയും ഒപ്പുവെച്ചത്. നിക്ഷേപകരംഗത്തും ഇരുരാജ്യങ്ങൾക്കുമിടയിൽ ഊഷ്മളമായ ബന്ധമാണുള്ളത്. നൂറ്റി ഇരുപതോളം കമ്പനികളാണ് വിവിധ ഖത്തറി സ്ഥാപനങ്ങളുമായി നിക്ഷേപക്കരാറിൽ ഒപ്പുവെച്ചിട്ടുള്ളത്.