August 29, 2021
August 29, 2021
ദോഹ : സ്വകാര്യകമ്പനികൾക്ക് തങ്ങളുടെ വിവരങ്ങൾ എളുപ്പത്തിൽ ക്രോഡീകരിക്കാൻ സൗകര്യമൊരുക്കി ഖത്തർ. ഖത്തർ ചേംബർ തയ്യാറാക്കിയ ഓൺലൈൻ സംവിധാനത്തിലൂടെ കമ്പനികൾക്ക് അവരുടെ എല്ലാ വിവരങ്ങളും ഇൻഡസ്ട്രിയൽ, കൊമേർഷ്യൽ ഡയറക്ടറികളിൽ ചേർക്കാൻ കഴിയും. ഡയറക്ടറിയിൽ നിലവിൽ ചേർത്ത വിവരങ്ങൾ തിരുത്താനും ഇതുവഴി കഴിയും.
വിദേശത്ത് നിന്നുള്ള നിക്ഷേപകർക്ക് കമ്പനികളുടെ പ്രവർത്തനനിലവാരം മനസിലാക്കി നിക്ഷേപം നടത്താനും ഈ നീക്കം സഹായകമാവുമെന്ന് വിലയിരുത്തപ്പെടുന്നു. ഖത്തറിന്റെ ദേശീയ സമ്പദ് വ്യവസ്ഥയിൽ എത്രത്തോളം പങ്ക് സ്വകാര്യസ്ഥാപനങ്ങൾ വഹിക്കുന്നുണ്ടെന്ന് മനസിലാക്കാനും ഈ സംവിധാനം വഴി കഴിയുമെന്ന് ഖത്തർ ചേംബർ ജനറൽ മാനേജർ സലീഹ് ബിൻ ഹമദ് അൽ ഷാർക്കി വ്യക്തമാക്കി. കമ്പനികൾക്ക് ആശയവിനിമയം നടത്താനും ഇതുവഴി കഴിയുമെന്നും, സാമ്പത്തിക, വ്യവസായ രംഗത്ത് ഇതിലൂടെ വിപ്ലവങ്ങൾ തന്നെ സാധ്യമാകുമെന്നാണ് തങ്ങളുടെ പ്രതീക്ഷ എന്നും ഷാർക്കി കൂട്ടിച്ചേർത്തു. പുതിയ സംവിധാനം വഴി കൃത്യമായ വിവരങ്ങൾ ചേർക്കുന്ന കമ്പനികൾക്ക് ചേംബറിന്റെ "വെരിഫൈഡ്" ടാഗ് ലഭിക്കും.
