January 07, 2022
January 07, 2022
ദോഹ : കോവിഡിന്റെ അതിവേഗ വ്യാപനം കണക്കിലെടുത്ത് ഹമദ് അന്താരാഷ്ട്ര വിമാനത്താവളത്തിൽ പുതിയ നിയന്ത്രണങ്ങൾ പ്രഖ്യാപിച്ചു. യാത്രക്കാർ വിമാനം പുറപ്പെടുന്നതിന്റെ മൂന്ന് മണിക്കൂർ മുൻപ് വിമാനത്താവളത്തിൽ എത്തണമെന്ന് അധികൃതർ അറിയിച്ചു. പനി, തൊണ്ടവേദന തുടങ്ങിയ കോവിഡ് ലക്ഷണങ്ങൾ ഉള്ളവർ വിമാനത്താവളം സന്ദർശിക്കരുത് എന്നും അധികൃതർ അറിയിച്ചു. വിമാനത്താവളത്തിൽ ഉടനീളം താപനില അളക്കാൻ ശേഷിയുള്ള ക്യാമറകൾ ഉണ്ടെന്നും, ആരോഗ്യപ്രവർത്തകരുടെ മെഡിക്കൽ ക്ലിനിക്ക് 24 മണിക്കൂറും വിമാനത്താവളത്തിൽ സജ്ജമാണെന്നും അധികൃതർ കൂട്ടിച്ചേർത്തു.
വിമാനത്താവളത്തിൽ നിന്നും യാത്രക്കാർക്ക് അനുവദിച്ചു നൽകാറുള്ള, കുട്ടികൾക്കായുള്ള ട്രോളികളുടെ സേവനം താൽകാലികമായി നിർത്തിവെച്ചു. ടെർമിനലിലും സമീപത്തുമായുള്ള, യാത്രക്കാർ അടുത്തിടപഴകുന്ന എഴുപതോളം ഇടങ്ങളിൽ ഓരോ 15 മിനിട്ടിലും അണുനശീകരണം നടത്തുന്നുണ്ട് എന്നും ഹമദ് അധികൃതർ അറിയിച്ചു. ജീവനക്കാർക്ക് കോവിഡ് വ്യാപനത്തിന്റെ ഭാഗമായി പ്രത്യേക പരിശീലനം നൽകിയിട്ടുണ്ടെന്നും ഹമദ് വിമാനത്താവള അതോറിറ്റി പുറത്തിറക്കിയ പ്രസ്താവനയിൽ പറയുന്നു.
