March 02, 2022
March 02, 2022
മീഡിയാവൺ ചാനലിന് സംപ്രേക്ഷണവിലക്ക് ഏർപ്പെടുത്തിയ നടപടി ശരിവച്ച ഹൈക്കോടതിക്കെതിരെ നൽകിയ അപ്പീൽ തള്ളി. ചീഫ് ജസ്റ്റിസ് എസ്. മണികുമാർ, ജസ്റ്റിസ് ഷാജി പി. ചാലി എന്നിവരടങ്ങുന്ന ബെഞ്ചാണ് അപ്പീൽ തള്ളിയത്. മാധ്യമം ബ്രോഡ്കാസ്റ്റിംഗ് ലിമിറ്റഡും, കേരള പത്ര പ്രവർത്തക യൂണിയനും അടക്കമുള്ളവരാണ് അപ്പീൽ നൽകിയിരുന്നത്. അതേസമയം, നിയമപോരാട്ടം അവസാനിപ്പിക്കില്ലെന്നും, സുപ്രീം കോടതിയെ സമീപിക്കുമെന്നും മീഡിയ വൺ മാനേജ്മെന്റ് വ്യക്തമാക്കി.
കേന്ദ്രസർക്കാർ നടപടി ശരിവെച്ച സിംഗിൾ ബെഞ്ച് ഉത്തരവിൽ ഇടപെടേണ്ട സാഹചര്യം ഇല്ലെന്ന് ചൂണ്ടിക്കാട്ടിയാണ് ഹൈക്കോടതി അപ്പീൽ തള്ളിയത്. ജനുവരി 31 നാണ് കേന്ദ്രസർക്കാർ മീഡിയാ വൺ അടച്ചുപൂട്ടാൻ ഉത്തരവിട്ടത്. ഫെബ്രുവരി എട്ടിന് വിധിക്കെതിരെ നൽകിയ ഹരജികൾ സിംഗിൾ ബെഞ്ച് തള്ളിയിരുന്നു. പിന്നാലെയാണ് അപ്പീൽ ഹർജിയുമായി മീഡിയ വൺ, ഡിവിഷൻ ബെഞ്ചിന് മുന്നിലെത്തിയത്. മീഡിയ വണ്ണിന് വേണ്ടി സുപ്രീം കോടതി അഭിഭാഷകൻ ദുഷ്യന്ത് ദവെയും, കേന്ദ്രസർക്കാറിന് വേണ്ടി അഡീ. സോളിസിറ്റർ ജനറൽ അമൻ ലേഖിയും ഹാജരായി. മീഡിയ വണ്ണിന് വിലക്കേർപ്പെടുത്താൻ കാരണമായി പറയപ്പെടുന്ന രഹസ്യാന്വേഷണ വിഭാഗങ്ങളുടെ റിപ്പോർട്ട് ഇതുവരെ പുറത്തുവിട്ടിട്ടില്ല. മുദ്ര വെച്ച കവറിലാണ് ഈ വിവരങ്ങൾ കേന്ദ്രം, സിംഗിൾ ബെഞ്ചിന് കൈമാറിയത്.