April 27, 2023
April 27, 2023
ന്യൂസ്റൂം ബ്യുറോ
കോഴിക്കോട് :സിനിമയിൽ എണ്ണിയാലൊടുങ്ങാത്ത ഹാസ്യവേഷങ്ങളിലും ജീവിതത്തിൽ കൃത്യമായ നിലപാടുകളുള്ള മനുഷ്യനായും ജീവിച്ച നടൻ മാമുക്കോയയുടെ സംസ്കാര ചടങ്ങുകൾ പൂർത്തിയായി.മുഹമ്മദ് അബ്ദുറഹിമാൻ,ഇ.മൊയ്തുമൗലവി ഉൾപ്പെടെയുള്ള പ്രമുഖർ അന്ത്യം വിശ്രമം കൊള്ളുന്ന കോഴിക്കോട് ബീച്ചിന് അഭിമുഖമായി കണ്ണംപറമ്പ് ശ്മശാനത്തിൽ രാവിലെ പതിനൊന്ന് മണിയോടെയായിരുന്നു ഖബറടക്കം.
പൂർണ ഔദ്യോഗിക ബഹുമതികളോടെയായിരുന്നു സംസ്കാര ചടങ്ങുകൾ. രാവിലെ ഒൻപത് വരെ വീട്ടിൽ പൊതുദർശനത്തിന് ശേഷം അരക്കിണർ മുജാഹിദ് പള്ളിയിൽ മയ്യത്ത് നിസ്കാരം പൂർത്തിയാക്കി ആംബുലൻസിൽ മൃതദേഹം കണ്ണംപറമ്പ് ഖബർസ്ഥാനിൽ എത്തിക്കുകയായിരുന്നു.
ഇന്നലെ രാത്രി ഏറെ വൈകിയും മാമുക്കോയയെ അവസാനമായി ഒരുനോക്കുകാണാൻ നിരവധി ആളുകളാണ് കോഴിക്കോട്ടേക്കെത്തിയത്.കോഴിക്കോട് ടൗൺ ഹാളിൽ രാത്രി പത്ത് മണി വരെ പൊതുദർശനമുണ്ടായിരുന്നു. രാത്രി വൈകിയാണ് ഭൗതികശരീരം വീട്ടിലേക്കെത്തിച്ചത്.
ഇന്നലെ ഉച്ചയോടെ കോഴിക്കോട് മൈത്ര ആശുപത്രിയിൽ വച്ചായിരുന്നു മാമുക്കോയയുടെ വിയോഗം. ഏപ്രിൽ 24 ന് മലപ്പുറം വണ്ടൂരിലെ സെവൻസ് ടൂർണമെന്റ് ഉദ്ഘാടനത്തിനിടെയാണ് അദ്ദേഹത്തിന് ഹൃദയാഘാതം ഉണ്ടായത്. ചികിത്സയിലിരിക്കെയായിരുന്നു മരണം.
ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക https://chat.whatsapp.com/KIGk615xlF1ILlMGxpUXqI