November 17, 2021
November 17, 2021
അജു അഷറഫ്
തിരുവനന്തപുരം : കേരളത്തിലെ ഏറ്റവും ജനകീയനായ മജീഷ്യനാരെന്ന ചോദ്യത്തിന്, രണ്ടാമതൊന്ന് ആലോചിക്കാതെ ആരും പറയുന്ന ഉത്തരമാണ് ഗോപിനാഥ് മുതുകാട്. സ്വതസിദ്ധമായ നിറചിരിയും, അപാരമായ കയ്യടക്കവുമായി വേദികളെ പുളകം കൊള്ളിക്കാറുള്ള ഗോപിനാഥ് മുതുകാട്, തന്റെ മായാജാലങ്ങൾ അവസാനിപ്പിക്കുകയാണെന്ന് പ്രഖ്യാപിച്ചു കഴിഞ്ഞു. ഏഷ്യാനെറ്റ് ചാനലിന് നൽകിയ അഭിമുഖത്തിലാണ് മുതുകാട് ഈ തീരുമാനം അറിയിച്ചത്. നാലരപതിറ്റാണ്ടുകൾ നീണ്ടുനിന്ന മായാജാല കരിയറിനാണ് ഇതോടെ തിരശ്ശീല വീഴുന്നത്.
പണം സ്വീകരിച്ചുള്ള മാജിക് പ്രകടനങ്ങൾ ഇനി നടത്തില്ലെന്ന് പ്രഖ്യാപിച്ച മുതുകാട്, ഇനിയുള്ള കാലം ഭിന്നശേഷിക്കാരായ കുട്ടികൾക്കൊപ്പം ചെലവഴിക്കാനാണ് തനിക്ക് താൽപര്യമെന്നും കൂട്ടിച്ചേർത്തു. സന്നദ്ധപ്രവർത്തനങ്ങളുടെ ഭാഗമായുള്ള ചെറിയ മാജിക് ഷോകൾ ഇനിയും നടത്തുമെന്നും മുതുകാട് അറിയിച്ചു. കഴിഞ്ഞ ഒന്നരവർഷക്കാലമായി 'ബീതോവൻ' എന്ന സ്പെഷ്യൽ സ്കൂളിലെ വിദ്യാർത്ഥികൾക്കൊപ്പമായിരുന്ന മുതുകാട്, www.differentartcentre.com എന്ന പേരിൽ വിഭിന്നശേഷിക്കാരായ കുട്ടികളുടെ സർഗ്ഗ-കലാ വാസനകൾ വളർത്താൻ ഒരു വെബ്‌സൈറ്റിനും രൂപം നൽകിയിട്ടുണ്ട്.
