February 28, 2022
February 28, 2022
ദോഹ : രാജ്യത്തെ പുതിയ കോവിഡ് കേസുകളുടെ എണ്ണത്തിൽ ഗണ്യമായ കുറവ് രേഖപ്പെടുത്തിയതോടെ, ലുസൈൽ ഡ്രൈവ് ത്രൂ കേന്ദ്രത്തിന്റെ പ്രവർത്തനം അവസാനിപ്പിക്കാൻ തീരുമാനിച്ചതായി ആരോഗ്യമന്ത്രാലയം അറിയിച്ചു. കോവിഡ് പരിശോധനയ്ക്കും വാക്സിനേഷനുമുള്ള സൗകര്യമായിരുന്നു ഇവിടെ സജ്ജീകരിച്ചിരുന്നത്. ഇന്ന് രാത്രി ഒൻപത് മണിയോടെ കേന്ദ്രം അടച്ചുപൂട്ടും.
ജനുവരിയിൽ പ്രവർത്തനം ആരംഭിച്ച ഈ കേന്ദ്രത്തിലൂടെ ഒരുലക്ഷത്തിലധികം പേർക്ക് ബൂസ്റ്റർ ഡോസുകൾ നൽകാനും, കോവിഡ് പരിശോധന നടത്താനും അവസരം ലഭിച്ചു. ദിനംപ്രതി നടത്തേണ്ട കോവിഡ് പരിശോധനകളുടെ എണ്ണം ദിനംപ്രതി വർധിച്ച സാഹചര്യത്തിലാണ് ഇത്തരമൊരു കേന്ദ്രം തുറക്കാൻ തീരുമാനിച്ചതെന്നും, സ്ഥിതിഗതികൾ നിലവിൽ നിയന്ത്രണവിധേയം ആയതിനാലാണ് കേന്ദ്രം അടയ്ക്കുന്നതെന്നും പി.എച്ച്.സി.സി മാനേജിങ് ഡയറക്ടർ ഡോ. മറിയം അബ്ദുൾ മാലിക് വ്യക്തമാക്കി. ഖത്തറിലെ മുഴുവൻ പ്രാഥമിക ആരോഗ്യ കേന്ദ്രങ്ങളിലും തുടർന്നും കോവിഡ് അനുബന്ധ സേവനങ്ങൾ നൽകും. വ്യാപാര-വ്യവസായ മേഖലയിൽ നിന്നുള്ളവർക്കായി ആരംഭിച്ച ബുഗാർനിലെ കേന്ദ്രവും പ്രവർത്തനം തുടരുമെന്ന് അധികൃതർ അറിയിച്ചു.
