April 10, 2022
April 10, 2022
ടെഹ്‌റാൻ : നവംബറിൽ ആരംഭിക്കുന്ന ഖത്തർ ഫുട്‍ബോൾ ലോകകപ്പിൽ സഹായം വാഗ്ദാനം ചെയ്ത് ഇറാൻ. കാണികളുടെ വ്യോമയാനഗതാഗതം, താമസസൗകര്യം തുടങ്ങിയ വിവിധ മേഖലകളിൽ സഹായിക്കുമെന്ന് ഇറാൻ ഗതാഗതവകുപ്പ് മന്ത്രി റുസ്തം ക്വാസിമി അറിയിച്ചു. ഈ വർഷം നടത്തിയ ഖത്തർ സന്ദർശനത്തിനിടെ, ഇറാൻ പ്രസിഡന്റ് ഇബ്രാഹിം റൈസിയും ലോകകപ്പിൽ സഹകരിക്കാനുള്ള സന്നദ്ധത അറിയിച്ചിരുന്നു.
തെക്കൻ ഇറാനിലെ കിഷ് ദ്വീപിലെത്തിയതിന് പിന്നാലെയാണ് ഗതാഗതമന്ത്രി ലോകകപ്പിൽ സഹകരിക്കാനുള്ള തീരുമാനം അറിയിച്ചത്. ലോകകപ്പ് കാണാൻ കടൽ വഴി യാത്ര ചെയ്യുന്നവർക്ക് കിഷ് ദ്വീപിൽ ഇടത്താവളമൊരുക്കാനും പദ്ധതിയുണ്ട്. ഖത്തർ ഗതാഗത മന്ത്രി ജാസിം ബിൻ സൈഫ് അൽ സുലൈത്തി നാളെ കിഷ് ദ്വീപിൽ എത്തുന്നുണ്ട്. സഹകരണം സംബന്ധിച്ചുള്ള നിർണായക തീരുമാനങ്ങൾ ഈ കൂടിക്കാഴ്ചയിൽ ഉരുത്തിരിയുമെന്നാണ് കരുതപ്പെടുന്നത്.
