September 20, 2021
September 20, 2021
അൻവർ പാലേരി
ദോഹ: രണ്ട് ഡോസ് വാക്സിനുകളും സ്വീകരിച്ച ശേഷം ഇന്ത്യയിൽ നിന്നും ഖത്തറിൽ തിരിച്ചെത്തുന്നവർക്ക് ഹോട്ടൽ ക്വാറന്റൈൻ വ്യവസ്ഥയിൽ ഇളവുണ്ടോ എന്ന സംശയങ്ങൾക്ക് ഒടുവിൽ ഔദ്യോഗിക സ്ഥിരീകരണം..നിലവിൽ ഇന്ത്യയിൽ നിന്ന് വാക്സിനെടുത്ത് തിരിച്ചെത്തുന്നവർക്ക് പത്ത് ദിവസമാണ് ഹോട്ടൽ ക്വാറന്റൈനിന് നിർദ്ദേശിച്ചിട്ടുള്ള കാലയളവെങ്കിലും , ഹോട്ടലിൽ നടത്തുന്ന ആന്റിബോഡി പരിശോധനയിൽ ഫലം പോസറ്റിവ് ആവുകയും തുടർന്ന് നടത്തുന്ന പരിശോധനയിൽ കോവിഡ് നെഗറ്റിവ് ആവുകയും ചെയ്താൽ ക്വാറന്റൈൻ അവസാനിപ്പിക്കാൻ നിർദ്ദേശം ലഭിക്കുന്നതായി നേരത്തെ "ന്യൂസ്റൂം" റിപ്പോർട്ട് ചെയ്തിരുന്നു. പിന്നാലെയാണ് ഇതുസംബന്ധിച്ച ഔദ്യോഗിക അറിയിപ്പ് എത്തുന്നത്.
സാധാരണ നിലയിൽ ക്വാറന്റൈൻ കാലയളവ് ആരംഭിച്ച ശേഷം ഒൻപതാം ദിവസമാണ് പരിശോധന നടത്തുന്നത്.. എന്നാൽ, താല്പര്യമുള്ള വ്യക്തികൾക്ക് രണ്ടാം ദിവസം തന്നെ റാപിഡ് ആന്റിബോഡി ടെസ്റ്റ് നടത്താവുന്നതാണ്. പോസിറ്റീവ് ആണ് ഫലം എങ്കിൽ ക്വാറന്റൈനിൽ തുടരണം. എന്നാൽ കോവിഡ് ഫലം നെഗറ്റീവ് ആണെങ്കിൽ അതോടെ ക്വാറന്റൈൻ അവസാനിപ്പിക്കാൻ കഴിയും. ഒപ്പം മുൻകൂറായി ഹോട്ടലിൽ അടച്ച പണം തിരികെ ലഭിക്കുമെന്നും അധികൃതർ അറിയിച്ചു. ഹമദ് വിമാനത്താവളത്തിൽ എത്തുന്ന സമയത്ത് ആവശ്യമായ രേഖകൾ കയ്യിൽ കരുതണമെന്നും ഡിസ്കവർ ഖത്തർ തങ്ങളുടെ വെബ്സൈറ്റിൽ ഓര്മിപ്പിച്ചിട്ടുണ്ട്.