May 15, 2022
May 15, 2022
ദോഹ : ദീർഘകാലമായി കാത്തിരിക്കുന്ന ജിസിസി റെയിൽവേ ഉടൻ യാഥാർഥ്യമാകാൻ സാധ്യതയുള്ളതായി ഓക്‌സ്‌ഫോർഡ് ബിസിനസ് ഗ്രൂപ്പ് വിലയിരുത്തി.ഗൾഫ് രാജ്യങ്ങളെ പരസ്പരം ബന്ധിപ്പിച്ചുകൊണ്ടുള്ള പദ്ധതി നിലവിൽ വന്നാൽ ഗൾഫിലുടനീളമുള്ള വ്യാപാരത്തെ അത് വലിയ തോതിൽ സഹായിക്കുമെന്നും റിപ്പോർട്ടിൽ ചൂണ്ടിക്കാട്ടുന്നു.ഗൾഫ് മേഖലയിലെ ചരക്കുനീക്കം സുഗമമാക്കുകയാണ് പദ്ധതിയിലൂടെ ലക്ഷ്യമാക്കുന്നത്.
പദ്ധതിയുടെ ഏകോപനത്തിന് മേൽനോട്ടം വഹിക്കാൻ ജിസിസി റെയിൽവേ അതോറിറ്റി സ്ഥാപിക്കുന്നതിന് ആറ് ജിസിസി രാജ്യങ്ങളിലെ നേതാക്കൾ കഴിഞ്ഞ വർഷം ഡിസംബറിൽ അംഗീകാരം നൽകിയതോടെ പദ്ധതിയുമായി ബന്ധപ്പെട്ട കാര്യങ്ങൾ ഏറെ മുന്നോട്ടുപോയതായും ഓക്‌സ്‌ഫോർഡ് ബിസിനസ് ഗ്രൂപ്പ് വെബ്‌സൈറ്റിൽ സ്ഥിരീകരിച്ചു.
2177 കിലോമീറ്റർ ദൈർഘ്യമുള്ള റെയിൽപാത ആറ് ജിസിസി രാജ്യങ്ങളെയും കരമാർഗം പരസ്പരം ബന്ധിപ്പിക്കും.വടക്ക് കുവൈത്ത് സിറ്റിയിൽ നിന്ന് ആരംഭിക്കുന്ന റെയിൽ ലൈൻ ബഹ്‌റൈൻ തലസ്ഥാനമായ മനാമ,ഖത്തർ തലസ്ഥാന നഗരമായ ദോഹ,സൗദി അറേബ്യയിലെ തീരദേശ നഗരങ്ങളായ ജുബൈൽ, ദമാം എന്നിവ വഴി കടന്നുപോകും.യു.എ.ഇ.യിലെ അബുദാബി, ദുബായ്, ഫുജൈറ എന്നീ പ്രധാന നഗരങ്ങൾ കൂടി പിന്നിട്ട ശേഷം ഒമാൻ തലസ്ഥാനമായ മസ്‌കത്തിലെ ടെർമിനൽ സ്റ്റേഷനിൽ സമാപിക്കും.
പ്രധാന ജിസിസി നഗരങ്ങൾക്കും തുറമുഖങ്ങൾക്കുമിടയിലെ യാത്രാ സമയവും പണച്ചിലവും കുറച്ച് ചരക്ക് നീക്കം എളുപ്പമാകുന്നതിലൂടെ ഗൾഫ് മേഖലയിലേക്ക് കൂടുതൽ നിക്ഷേപം ആകർഷിക്കാൻ കഴിയുമെന്നും ഓക്‌സ്‌ഫോർഡ് ബിസിനസ് ഗ്രൂപ്പ് ചൂണ്ടിക്കാട്ടുന്നു.
ന്യൂസ്‌റൂം വാർത്തകൾ ലഭിക്കാൻ ഈ ലിങ്കിൽ(https://www.facebook.com/groups/Newsroomclub) ക്ലിക്ക് ചെയ്ത് ന്യൂസ്‌റൂം എഫ്.ബി പേജിൽ അംഗമാവുക.വാട്സ്ആപ്പിൽ വാർത്തകൾ ലഭിക്കാൻ 00974 33450597 വാട്സ്ആപ് നമ്പറിൽ സന്ദേശമയക്കുക
