February 09, 2022
February 09, 2022
ദുബായ് : എക്സ്പോയുടെ ഭാഗമായി തയ്യാറാക്കിയ ഖത്തർ പവലിയനിലേക്ക് സന്ദർശകരുടെ ഒഴുക്ക് തുടരുന്നു. ഏറ്റവും ഒടുവിലെ റിപ്പോർട്ടുകൾ പ്രകാരം എട്ട് ലക്ഷത്തിലധികം പേരാണ് ഖത്തർ പവലിയനിലേക്ക് സന്ദർശകരായെത്തിയത്. എക്സ്പോ ആരംഭിച്ച ഒക്ടോബർ ഒന്ന് മുതലുള്ള കണക്കുകളാണിത്.
സസ്റ്റൈനബിളിറ്റി ഡിസ്ട്രിക്ടിൽ സ്ഥിതി ചെയ്യുന്ന ഖത്തർ പവലിയനിൽ രണ്ട് പ്രധാന ഗാലറികളിലായാണ് പ്രദർശനം ഒരുക്കിയിട്ടുള്ളത്. രാജ്യത്തിന്റെ ചരിത്രവും വർത്തമാനവും സമീപഭാവിയും, ദൃശ്യവും ശബ്ദവും സമന്വയിപ്പിച്ച പരിപാടികളിലൂടെ വരച്ചുകാട്ടുന്ന കലാവിരുന്നാണ് പവലിയനിലുള്ളത്. നവംബറിൽ നടക്കാനിരിക്കുന്ന ഫുട്ബോൾ ലോകകപ്പുമായി ബന്ധപ്പെട്ട പ്രദർശനങ്ങളും ഖത്തർ പവലിയനിലുണ്ട്. ലോകപ്രശസ്ത ഡിസൈനറായ സാന്റിയാഗോ കലട്രാവയാണ് പവലിയൻ രൂപകൽപന ചെയ്തത്.