November 18, 2021
November 18, 2021
യൂറോപ്യൻ യോഗ്യതാ റൗണ്ടിലൂടെ ഖത്തർ ലോകകപ്പിൽ സ്ഥാനമുറപ്പിച്ചതിന് പിന്നാലെ, ഖത്തറിനെതിരെ പ്രതിഷേധിക്കുമെന്ന പ്രഖ്യാപനവുമായി ഡെന്മാർക്ക് ഫുട്ബോൾ അസോസിയേഷൻ രംഗത്ത്. മത്സരത്തിന് തൊട്ടുമുൻപ് അണിയാറുള്ള പരിശീലന ജേഴ്സിയിൽ മനുഷ്യാവകാശ സന്ദേശങ്ങൾ ആലേഖനം ചെയ്യുമെന്നാണ് ഡെന്മാർക്ക് ഫുട്ബോൾ ഫെഡറേഷന്റെ പ്രസ്താവന. വിദേശതൊഴിലാളികളോട് ഖത്തർ സ്വീകരിക്കുന്ന നയങ്ങൾക്കെതിരെ പ്രതിഷേധമുയർത്തുമെന്ന സൂചന നൽകി ഇംഗ്ലണ്ട് പ്രസ്താവന ഇറക്കിയിരുന്നു. പിന്നാലെയാണ് ഡെന്മാർക്കും നയം വ്യക്തമാക്കിയത്.
2010 ൽ, ലോകകപ്പിനുള്ള ആതിഥേയത്വം ഖത്തർ സ്വന്തമാക്കിയ ദിനം മുതൽ വിവിധ തരത്തിലുള്ള ആരോപണങ്ങളുമായി യൂറോപ്യൻ രാജ്യങ്ങൾ രംഗത്തെത്തിയിരുന്നു. ആതിഥേയരെ തിരഞ്ഞെടുക്കാനുള്ള വോട്ടെടുപ്പിൽ കൃത്രിമം നടന്നിട്ടുണ്ടെന്നും പല രാജ്യങ്ങളും വാദിച്ചെങ്കിലും, ഫിഫ ഈ വാദങ്ങളെ തള്ളുകയായിരുന്നു. പിന്നാലെയാണ് ജേഴ്സിയിൽ പ്രതിഷേധം രേഖപ്പെടുത്തുക മുതലായ മാർഗങ്ങൾ അവലംബിക്കുമെന്ന് രാജ്യങ്ങൾ അറിയിച്ചത്. ഖത്തറിലേക്ക് വളരേ ചെറിയ സംഘത്തെയാവും അയക്കുക എന്നും ഡെന്മാർക്ക് ഫുട്ബോൾ ഫെഡറേഷൻ വ്യക്തമാക്കിയിട്ടുണ്ട്. ഖത്തറിന്റെ ലോകകപ്പ് അനുബന്ധ പരിപാടികളുടെ ഭാഗമാവുക എന്നതല്ല, ലോകകപ്പിൽ കളിക്കുക എന്നതാണ് തങ്ങളുടെ ഉദ്ദേശമെന്നും, അതിനാൽ തന്നെ ഖത്തറിലേക്ക് ആവശ്യമായ യാത്രകൾ മാത്രമേ നടത്തൂ എന്നും ഡെന്മാർക്ക് ഫുട്ബോൾ ഫെഡറേഷൻ മാനേജിങ് ഡയറക്ടർ ജേക്കബ് ജെൻസൺ അറിയിച്ചു.