January 08, 2022
January 08, 2022
കെയ്റോ : ഈജിപ്തിലെ സിനായ് പ്രവിശ്യയിൽ ബസ്സുകൾ കൂട്ടിയിടിച്ചുണ്ടായ അപകടത്തിൽ 16 പേർ കൊല്ലപ്പെടുകയും, 18 പേർക്ക് പരിക്കേൽക്കുകയും ചെയ്തു. മിനി ബസും, പബ്ലിക് ട്രാൻസ്പോർട്ടേഷൻ ബസ്സും കൂട്ടിയിടിച്ചാണ് അപകടം ഉണ്ടായത്. തോർ പട്ടണത്തിൽ നിന്നും ഏതാണ്ട് പത്ത് കിലോമീറ്റർ അകലെയാണ് അപകടമുണ്ടായതെന്നും പതിമൂന്നോളം ആംബുലൻസുകൾ സ്ഥലത്ത് എത്തിച്ചാണ് പരിക്കേറ്റവരെയും, മരണപ്പെട്ടവരുടെ മൃതദേഹങ്ങളും സംഭവസ്ഥലത്ത് നിന്ന് നീക്കിയതെന്നും പോലീസ് അറിയിച്ചു.
ഗതാഗത സുരക്ഷയിൽ ഏറെ പിന്നിലുള്ള ഈജിപ്തിലെ റോഡുകളിൽ ഓരോ വർഷവും ആയിരക്കണക്കിന് ആളുകൾക്കാണ് ജീവൻ നഷ്ടപ്പെടുന്നത്. ഒക്ടോബറിൽ ഉണ്ടായ അപകടത്തിൽ 19 പേരും, സെപ്റ്റംബറിൽ നടന്ന ബസ്സപകടത്തിൽ 12 പേരും കൊല്ലപ്പെട്ടിരുന്നു. കണക്കുകൾ പ്രകാരം 2019 ൽ മാത്രം പതിനായിരത്തോളം റോഡപകടങ്ങൾ ആണ് ഈജിപ്തിൽ ഉണ്ടായത്. ഇവയിൽ 3480 പേർ മരണമടയുകയും ചെയ്തു.