August 11, 2021
August 11, 2021
ദുബായ് : ദുബായിലെ കാലാവധി കഴിഞ്ഞ താമസ വിസക്കാരുടെ വിസ കാലാവധി നീട്ടി നല്‍കുന്നു.ഇക്കാര്യത്തില്‍ ഒൗദ്യോഗിക സ്ഥിരീകരണം വന്നിട്ടില്ലെങ്കിലും നല്ലൊരു ശതമാനം പ്രവാസികള്‍ക്കും രണ്ടോ മൂന്നോ നാലോ മാസത്തേക്ക് വിസ കാലാവധി നീട്ടിക്കിട്ടിയിട്ടുണ്ട്. ജി.ഡി.ആര്‍.എഫ്.എയുടെ വെബ്സൈറ്റ് വഴി നിലവില്‍ ദുബായ് വിസക്കാര്‍ക്ക് മാത്രമാണ് കാലാവധി നീട്ടിക്കിട്ടിയിരിക്കുന്നത്. അബൂദബി, ഷാര്‍ജ ഉള്‍പെടെ മറ്റ് എമിറേറ്റുകളിലെ വിസകളുടെ കാലാവധിയും ഇത്തരത്തില്‍ നീട്ടുമെന്ന പ്രതീക്ഷയിലാണ് പ്രവാസികള്‍.
അതേസമയം, മെയ് മാസത്തിന് ശേഷം കാലാവധി അവസാനിച്ച വിസകളുടെ കാലാവധിയാണ് നിലവില്‍ നീട്ടിയിരിക്കുന്നതെന്നാണ്വിവരം.ഡേറ്റ് കാണിക്കുന്നത് നവംബര്‍ 9, ഡിസംബര്‍ 9 തീയതികളാണ്. ഇതോടെ ദുബായിലേക്ക് യാത്ര ചെയ്യാന്‍ ജി.ഡി.ആര്‍.എഫ്.എയുടെ അനുമതി ലഭിച്ചുതുടങ്ങിയതായി അനുഭവസ്ഥര്‍ വെളിപ്പെടുത്തി.
ദുബായിലെ താമസവിസക്കാര്‍ നാട്ടിലാണെങ്കില്‍ ആറ് മാസത്തിനുള്ളില്‍ ദുബായിലെത്തി വിസ പുതുക്കണമെന്നാണ് നിയമം. എന്നാല്‍, യാത്രാവിലക്ക് മൂലം പലര്‍ക്കും ഇതിന് കഴിഞ്ഞിരുന്നില്ല. ഇതോടെ ഇവരുടെ വിസ കാലാവധി കഴിഞ്ഞിരുന്നു. ഇത്തരക്കാര്‍ക്ക് ദുബായിലെത്തി വിസ പുതുക്കാനുള്ള അവസരമാണ് ഇപ്പോള്‍ ലഭിച്ചിരിക്കുന്നത്. https://amer.gdrfad.gov.ae/visa-inquiry എന്ന ലിങ്ക് വഴി വിസ കാലാവധി പരിശോധിക്കാം.
