November 13, 2019
November 13, 2019
അബുദാബി : ഇന്ന് രാവിലെ അബുദാബിയിലെ മറീനാ ഏരിയയിൽ കാറിന് തീപിടിച്ചുണ്ടായ ദുരന്തത്തിൽ മരിച്ചത് സ്വദേശി ദമ്പതികളുടെ മക്കളാണെന്ന്‌ പോലീസ് അറിയിച്ചു. പതിനെട്ട് മാസം പ്രായമുള്ള മഖ്‌തൂം ഇബ്രാഹിം അൽ ഹസൂനി, ശമായിൽ ഇബ്രാഹിം അൽ ഹസൂനി (3) എന്നീ കുട്ടികളാണ് മരിച്ചത്. കുട്ടികളുടെ മൃതദേഹങ്ങൾ ഇന്ന് ളുഹർ നമസ്കാരത്തിന് ശേഷം ബനിയാസ് ഖബറിസ്ഥാനിൽ ഖബറടക്കി.
ഇന്ന്(ബുധൻ) രാവിലെയാണ് അപകടമുണ്ടായത്. ബി.എം.ഡബ്ള്യു 4 x 4 ഫോർ കാറിന് തീപിടിച്ചാണ് സഹോദരങ്ങളായ കുട്ടികൾ വെന്തു മരിച്ചത്. കുട്ടികളെ കാറിൽ ഇരുത്തിയ ശേഷം മാതാവ് പുറത്തു പോയപ്പോഴാണ് തീപിടുത്തമുണ്ടായത്. പരിസരവാസികളും മാതാവും കാറിൽ നിന്ന് കുട്ടികളെ രക്ഷിക്കാൻ ശ്രമിച്ചെങ്കിലും നിമിഷങ്ങൾക്കുള്ളിൽ കാർ കത്തിയമരുകയായിരുന്നു. ഒരു കാരണവശാലും കുട്ടികളെ വാഹനത്തിലിരുത്തി രക്ഷിതാക്കൾ പുറത്തിറങ്ങരുതെന്നും ഇത്തരം പ്രവണതകൾ ജീവഹാനി ഉൾപെടെയുള്ള വലിയ അപകടങ്ങൾക്ക് ഇടയാക്കുമെന്നും അബുദാബി പൊലീസിലെ ക്രിമിനൽ സെക്യൂരിറ്റി വിഭാഗം ഡയറക്റ്റർ ബ്രിഗേഡിയർ ജനറൽ മുഹമ്മദ് സുഹൈൽ അൽ റാഷിദി മുന്നറിയിപ്പ് നൽകി.
