September 06, 2019
September 06, 2019
ദോഹ : അന്താരാഷ്ട്ര ഓൺലൈൻ ടാക്‌സികൾ ഡ്രൈവർമാരെ ചൂഷണം ചെയ്യുകയാണെന്ന പരാതി ശക്തമായതിനെ തുടർന്ന് ഖത്തറിലെ മലയാളികളുടെ നേതൃത്വത്തിൽ പുതിയ ഓൺലൈൻ ടാക്സിക്ക് രൂപം നൽകുന്നു.വിവിധ രാജ്യങ്ങളിൽ നിന്നുള്ള ലിമോസിൻ ഉടമകളെ കൂടി ഉൾപെടുത്തിയാണ് കോലോ എന്ന പേരിൽ പുതിയ ഓൺലൈൻ ടാക്സി നിലവിൽ വരുന്നത്.
വലിയ മുതൽ മുടക്കോ സ്വന്തമായി ടാക്‌സികളോ ഡ്രൈവർമാരോ ഇല്ലാതെ നടത്തുന്ന അന്താരാഷ്ട്ര ഭീമന്മാരായ ഓൺലൈൻ ടാക്സികളിൽ പലതും ഡ്രൈവർമാരെ ചൂഷണം ചെയ്യുന്നതായാണ് ഇവരുടെ പരാതി.ടാക്സി ഡ്രൈവർമാർക്ക് തുച്ഛമായ വരുമാനം മാത്രമാണ് ഇവരിൽ നിന്ന് ലഭിക്കുന്നതെന്നും മലയാളികളായ ടാക്സി ഡ്രൈവർമാർ പറയുന്നു. ഇതിന്റെ അടിസ്ഥാനത്തിലാണ് ഖത്തറിലെ മലയാളികളായ ലിമോസിൻ ഉടമകളുടെ നേതൃത്വത്തിൽ പുതിയ ഓൺലൈൻ ടാക്സിക്ക് രൂപം നൽകുന്നത്.ഡ്രൈവർമാർക്ക് കൂടുതൽ സാമ്പത്തിക നേട്ടമുണ്ടാകുന്ന തരത്തിലാണ് പുതിയ കമ്പനിക്ക് രൂപം നൽകുന്നതെന്നും കോലോ ഓൺലൈൻ ടാക്സിക്ക് പിന്നിൽ പ്രവർത്തിക്കുന്നവർ 'ന്യൂസ്റൂമി'നോട് പറഞ്ഞു.ഇതിന്റെ ഭാഗമായി ഖത്തറിലെ ഇന്ത്യക്കാരായ ടാക്സി ഡ്രൈവർമാരുടെ കൂട്ടായ്മയും ഇവർ രൂപീകരിച്ചിട്ടുണ്ട്.ഇന്ത്യയിൽ നിന്നുള്ള മുഴുവൻ ടാക്സി ഡ്രൈവർമാരെയും കൊലോയ്‌ക്ക് കീഴിൽ കൊണ്ട് വരുന്നതിനു പുറമെ ഇവരുടെ ക്ഷേമ പ്രവർത്തനങ്ങൾക്കായി വിവിധ പദ്ധതികൾ ആവിഷ്കരിക്കാനും ലക്ഷ്യമാക്കിയാണ് 'ഹം ആപ്കേ സാത്ത്' HASAATH എന്ന പേരിൽ പുതിയ കൂട്ടായ്മയ്ക്ക് രൂപം നൽകിയത്.
കോലോ,ഹസാത്ത് എന്നിവയുമായി ബന്ധപ്പെട്ട കാര്യങ്ങൾ വിശദീകരിക്കാനും ഹസാത്ത് ഐഡി കാർഡുകളുടെ വിതരണത്തിനായി നാളെ പ്രത്യേക യോഗം വിളിച്ചു ചേർത്തിട്ടുണ്ട്. തുമാമ KMCC ഹോളിൽ നാളെ വൈകിട്ട് അഞ്ചുമണിക്കാണ് യോഗം.കോലോ പ്രതിനിധികളും വിവിധ മേഖലകളിൽ നിന്നുള്ള പ്രമുഖരും പരിപാടിയിൽ സംബന്ധിക്കും.ഖത്തറിലെ മുഴുവൻ ലിമോസിൻ ഡ്രൈവർമാരും യോഗത്തിൽ പങ്കെടുക്കണമെന്നും ബന്ധപ്പെട്ടവർ അറിയിച്ചിട്ടുണ്ട്.
