February 01, 2024
February 01, 2024
ദുബായ്: യു.എ.ഇയിൽ സന്ദർശകരായി എത്തുന്ന ആരോഗ്യ പ്രവർത്തകർക്ക് മൂന്ന് മാസം പ്രാക്ടീസ് ചെയ്യാനുള്ള ഹ്രസ്വകാല അനുമതി നൽകുമെന്ന് ദുബായ് ഹെൽത്ത് അതോറിറ്റി അറിയിച്ചു. ദുബായ് വേൾഡ് ട്രേഡ് സെന്‍ററിൽ നടക്കുന്ന ‘അറബ് ഹെൽത്ത് കോൺഗ്രസി’ലാണ് ഇക്കാര്യം അധികൃതർ വ്യക്തമാക്കിയത്. അടിയന്തരഘട്ടങ്ങളും അത്യാഹിതങ്ങളും ദുരന്തങ്ങളും കൈകാര്യം ചെയ്യുന്നതിന് പ്രദേശിക ആരോഗ്യ സംവിധാനങ്ങൾ പൂർണ സജ്ജമാണെന്ന് ഉറപ്പ് വരുത്താനാണ് സംവിധാനം ലക്ഷ്യമിടുന്നത്.
രാജ്യത്തെ ആരോഗ്യ സേവന സംവിധാനങ്ങളിൽ മെഡിക്കൽ പ്രഫഷനലുകളുടെ സാന്നിധ്യം ആവശ്യത്തിന് ഉറപ്പുവരുത്താനും പദ്ധതിയിലൂടെ സാധിക്കും. താൽക്കാലികമായി അനുവദിക്കുന്ന പെർമിറ്റ് തൊഴിൽ തേടുന്നവർക്കും ആശുപത്രികൾക്കും വലിയ രീതിയിൽ ഉപകരിക്കുമെന്നാണ് പ്രതീക്ഷിക്കുന്നത്.
എന്നാൽ, താൽക്കാലിക പെർമിറ്റ് നേടുന്നതിലൂടെ പിന്നീട് സ്ഥിരം പ്രഫഷനൽ ലൈസൻസ് ലഭിക്കുമെന്ന് ഉറപ്പിക്കാനാവില്ലെന്ന് ഡി.എച്ച്.എയുടെ ഹെൽത്ത് റെഗുലേഷൻ വിഭാഗം സി.ഇ.ഒ ഡോ. മർവാൻ അൽ മുല്ല പറഞ്ഞു. ഒരു പ്രത്യേക ഫീൽഡിൽ പ്രഫഷണൽ ലൈസൻസ് നേടുന്നത് ഏകീകൃത പ്രഫഷണൽ യോഗ്യതാ ഗൈഡിൽ വിവരിച്ചിരിക്കുന്ന എല്ലാ മാനദണ്ഡങ്ങളും പാലിക്കുന്നതിനെ ആശ്രയിച്ചിരിക്കുമെന്നും അദ്ദേഹം വ്യക്തമാക്കി.
പാസ്പോർട്ട് കോപ്പി, എമിറേറ്റ്സ് ഐ.ഡി (നിർബന്ധമില്ല), ഫോട്ടോ, ബിരുദ സർട്ടിഫിക്കറ്റ്, സ്വന്തം രാജ്യത്തെ പ്രഫഷനൽ ലൈസൻസ് (താമസക്കാർക്കും ഇന്‍റേൺസിനും ലൈസൻസ് പകർപ്പ് സമർപ്പിക്കേണ്ടതില്ല), സി.വി കോപ്പി തുടങ്ങിയവയാണ് അപേക്ഷ സമർപ്പിക്കാൻ ആവശ്യമെന്ന് ഡി.എച്ച്.എ വെബ്സൈറ്റിൽ പറയുന്നു.
ഓൺലൈനിൽ അപേക്ഷ സമർപ്പിച്ച് നിശ്ചിത ഫീസടച്ചാൽ ഡി.എച്ച്.എയുടെ വിലയിരുത്തലിനുശേഷം പെർമിറ്റ് ലഭിക്കും. താൽക്കാലികമായി ലഭിക്കുന്ന പെർമിറ്റ് പുതുക്കാനോ കൈമാറാനോ അനുവാദമുണ്ടാകില്ല. പെർമിറ്റിന്‍റെ കാലയളവ് ആരോഗ്യ സ്ഥാപനത്തിന് നിശ്ചയിക്കാം. എന്നാൽ, മൂന്നു മാസത്തിൽ കൂടുതൽ ഈ അനുമതി ഉപയോഗിച്ച് ജോലിയിൽ തുടരാനാവില്ലെന്നും വെബ്സൈറ്റിൽ പറയുന്നുണ്ട്. നഴ്സുമാർക്കും പ്രസവശുശ്രൂഷകർക്കും 1000 ദിർഹമും ഡോക്ടർമാർക്ക് 3000 ദിർഹമുമാണ് പെർമിറ്റ് ഫീസ്.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/KIGk615xlF1ILlMGxpUXqI
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
