August 14, 2023
August 14, 2023
ന്യൂസ്റൂം ബ്യൂറോ
അബുദാബി:യു.എ.ഇയിൽ സർക്കാർ സേവനങ്ങളുടെ പേരിൽ ഓൺലൈൻ തട്ടിപ്പ് നടക്കുന്നതായും ജാഗ്രത പാലിക്കണമെന്നും അധികൃതർ മുന്നറിയിപ്പ് നൽകി. സർക്കാർ ഓഫിസുകളുടെ പേരിൽ വ്യാജ സന്ദേശങ്ങൾ അയച്ച് പണം തട്ടിയെടുക്കയാണ് തട്ടിപ്പുകാരുടെ രീതി.. ഇത്തരം ലിങ്കുകൾ തുറക്കരുതെന്നും ജാഗ്രത പാലിക്കണമെന്നും അബുദാബി പൊലീസ് മുന്നറിയിപ്പ് നൽകി.
പ്രധാന ഹോട്ടലുകൾ, റസ്റ്ററന്റുകൾ എന്നിവയുടെ പേരിലും, സ്പെഷൽ ഓഫറുകളുടെ പേരിലും തട്ടിപ്പുകൾ നടക്കുന്നുണ്ട്. ഇത്തരം സൈറ്റുകളിൽ പണം നൽകുന്നതിന് മുൻപ് ഔദ്യോഗിക വെബ്സൈറ്റാണെന്ന് ഉറപ്പുവരുത്തണമെന്നും അധികൃതർ താക്കീത് നൽകി.വളർത്തു മൃഗങ്ങളെ വിൽപ്പനയ്ക്കും ദത്തെടുക്കാൻ ലഭ്യമാണെന്ന പേരിലും സമൂഹ മാധ്യമങ്ങളിൽ തെറ്റായ പരസ്യങ്ങൾ പ്രചരിക്കുന്നുണ്ട്. വളർത്തു മൃഗങ്ങളുടെ ഇൻഷുറൻസ്, ഷിപ്പിങ് ചാർജ് എന്ന പേരിൽ പണം തട്ടിയെടുക്കുകയാണ് ഇവർ ലക്ഷ്യമിടുന്നത്.
കൂടുതൽ വിശ്വാസ്യത നൽകാൻ ബാങ്ക് അക്കൗണ്ട് വിവരങ്ങൾ നൽകുന്നവരുമുണ്ട്. ഇത്തരം അക്കൗണ്ടുകൾ തട്ടിപ്പിനു വേണ്ടി മാത്രമുള്ളതാണെന്നും പൊലീസ് വ്യക്തമാക്കി. ഉദ്യോഗാർഥികളെ ആകർഷിക്കാൻ വ്യാജ റിക്രൂട്മെന്റ് പരസ്യങ്ങളും തട്ടിപ്പുകാർ ഇറക്കിയിട്ടുണ്ട്.
ബാങ്ക് അക്കൗണ്ട് നമ്പർ, ഡെബിറ്റ്, ക്രെഡിറ്റ് കാർഡ് നമ്പറുകൾ, ഓൺലൈൻ ബാങ്കിങ് പാസ്വേഡ്, സിവിവി തുടങ്ങിയ വിവരങ്ങൾ ആരുമായും പങ്കുവയ്ക്കരുതെന്നും അധികൃതർ ആവശ്യപ്പെട്ടു. സംശയകരമായ ഫോൺ കോളുകൾ വന്നാൽ ഏറ്റവും അടുത്ത പൊലീസ് സ്റ്റേഷനിൽ വിവരം അറിയിക്കുകയോ, സുരക്ഷാ സേവനങ്ങൾക്കായുള്ള 8002626 എന്ന നമ്പരിൽ വിളിക്കുകയോ, 2828 എന്ന നമ്പരിൽ എസ്എംഎസ് അയയ്ക്കുകയോ ചെയ്യാമെന്ന് പൊലീസ് നിർദ്ദേശിച്ചു.
ന്യൂസ്റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/DoTp5mITouhJcwHKcDKLsm