April 03, 2024
April 03, 2024
ദുബായ്: ദുബായിൽ പുതിയ അധ്യയനവർഷം മുതൽ സ്വകാര്യ സ്കൂളുകൾക്ക് ഫീസ് വർധനക്ക് അനുമതി നൽകി. ദുബായിലെ സ്വകാര്യ സ്കൂളുകളെ നിയന്ത്രിക്കുന്ന വൈജ്ഞാനിക, മാനവ വികസന അതോറിറ്റിയാണ് (കെ.എച്ച്.ഡി.എ) ഫീസ് വർധനക്ക് അനുമതി നൽകിയത്. 5.2 ശതമാനം വരെ ഫീസ് വർധിപ്പിക്കാനാണ് അനുമതി. തുടർച്ചയായയി രണ്ടാം തവണയാണ് ഫീസ് വർധനക്ക് കെ.എച്ച്.ഡി.എ അനുമതി നൽകുന്നത്.
സ്കൂളുകൾ സമർപ്പിച്ച സാമ്പത്തിക ഓഡിറ്റ് റിപ്പോർട്ടിന്റെ അടിസ്ഥാനത്തിൽ കെ.എച്ച്.ഡി.എ സ്കൂളുകളുടെ വിദ്യാഭ്യാസ ചെലവ് സൂചിക (ഇ.സി.ഐ) 2.6 ശതമാനമായി കണക്കാക്കിയിരുന്നു. ഇതിന്റെ അടിസ്ഥാനത്തിൽ 2024-25 വർഷത്തേക്കുള്ള ഫീസിൽ മാറ്റം വരുത്താമെന്നാണ് നിർദേശം. അതേസമയം, കെ.എച്ച്.ഡി.എ സ്കൂളുകളിൽ നടത്തിയ വാർഷിക പരിശോധനയിൽ മികച്ച റേറ്റിങ് നിലനിർത്തുന്നവർക്കാണ് 5.2 ശതമാനം ഫീസ് വർധനക്ക് യോഗ്യത. റേറ്റിങ് കുറഞ്ഞാൽ ആനുപാതികമായി മാത്രമേ ഫീസ് വർധന അനുവദിക്കൂ.
ദുബായിൽ സ്കൂളുകൾക്ക് ഫീസ് വർധിപ്പിക്കാൻ കെ.എച്ച്.ഡി.എയുടെ അനുമതി വേണമെന്നാണ് വ്യവസ്ഥ. ദുർബലമായത്, സ്വീകാര്യമായത്, മികച്ചത്, ഏറ്റവും മികച്ചത്, ഔട്ട്സ്റ്റാൻഡിങ് എന്നിങ്ങനെയാണ് റേറ്റിങ്. ദുർബലമായതിൽ നിന്ന് സ്വീകാര്യമായതോ അല്ലെങ്കിൽ സ്വീകാര്യമായതിൽനിന്ന് മികച്ചതോ ആയി റേറ്റിങ് ഉയർത്തിയാൽ ഇ.സി.ഐയുടെ ഇരട്ടി ഫീസ് വർധിപ്പിക്കാം. അതായത് 5.2 ശതമാനം വർധന വരുത്താം. റേറ്റിങ് മികച്ചതിൽ നിന്ന് ഏറ്റവും മികച്ചതിലേക്ക് എത്തിയാൽ ഇ.സി.ഐയുടെ 1.75 തവണ, അതായത് 4.55 ശതമാനം ഫീസ് വർധിപ്പിക്കാനാവും. ഏറ്റവും മികച്ചതിൽ നിന്ന് ഔട്ട്സ്റ്റാൻഡിങ് നിലനിർത്തിയാൽ 1.5 തവണ, അതായത് 3.9 ശതമാനം ഫീസ് വർധനക്ക് അനുമതി ലഭിക്കും. ഒരേ പരിശോധന റേറ്റിങ് നിലനിർത്തുന്ന സ്കൂളുകൾക്ക് ഫീസ് 2.6 ശതമാനം വരെ വർധിപ്പിക്കാൻ അനുവദിക്കും. അതേസമയം, ദുബായിലെ ചില സ്കൂളുകളിൽ ഫീസ് വർധിപ്പിക്കില്ലെന്ന് പ്രഖ്യാപിച്ചിട്ടുണ്ട്.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/IocT7PQnr4MEYpMCPpqwIn
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F