January 25, 2024
January 25, 2024
ദുബായ്: ഷാർജ-മസ്കത്ത് റൂട്ടിൽ ബസ് സർവിസ് ആരംഭിക്കുന്നു. ഷാർജയിലെ എസ്.ആർ.ടി.എ ആസ്ഥാനത്ത് നടന്ന ചടങ്ങിൽ ഒമാന്‍റെ ദേശീയ ഗതാഗത കമ്പനിയായ മുവാസലാത്ത് സി.ഇ.ഒ ബദർ ബിൻ മുഹമ്മദ് അൽ നദാബിയും, ഷാർജ റോഡ്സ് ആൻഡ് ട്രാൻസ്‌പോർട്ട് അതോറിറ്റി (എസ്.ആർ.ടി.എ) ചെയർമാൻ എൻജിനീയർ യൂസഫ് ബിൻ ഖമീസ് അൽ അത്മാനിയും കരാറിൽ ഒപ്പുവച്ചു. ഇരുവിഭാഗങ്ങളിലെയും ഉദ്യോഗസ്ഥരും ചടങ്ങിൽ പങ്കെടുത്തു.
യു.എ.ഇക്കും ഒമാനിനുമിടയിൽ അന്താരാഷ്‌ട്ര ബസ് ഗതാഗത ശൃംഖല വിപുലീകരിക്കാനും ഇരു രാജ്യങ്ങൾക്കുമിടയിലെ ടൂറിസം മെച്ചപ്പെടുത്താനും യാത്രക്കാർക്ക് മികച്ച ഗതാഗത സൗകര്യമൊരുക്കാനുമാണ് ഇതിലൂടെ ലക്ഷ്യമിടുന്നത്. ബസ് സർവീസുകളുടെ ടിക്കറ്റ് ചാർജ്, സർവിസ് സമയം എന്നിവ ഉൾപ്പെടെയുള്ള വിവരങ്ങൾ മുവാസലാത്തിന്‍റെ സമൂഹ മാധ്യമ അക്കൗണ്ടിലൂടെ ഉടൻ പുറത്തുവിടുമെന്നാണ് വിവരം.
ഷാർജയിലെ ജുബൈൽ ബസ് സ്റ്റേഷനിൽ നിന്ന് മസ്കത്തിലെ അൽ അസൈബ സ്റ്റേഷനിലേക്ക് പ്രതിദിന സർവിസുകളാണ് ആരംഭിക്കുന്നത്. അതിർത്തിയിലെ നടപടി ക്രമങ്ങൾ വേഗത്തിലാക്കാൻ സ്പെഷൽ റൂട്ടുകളും അനുവദിക്കും. മുവാസലാത്തിന്‍റെ ഓൺലൈൻ ബുക്കിങ് പ്ലാറ്റ്ഫോമായ www.mwasalat.om വഴി ടിക്കറ്റ് ബുക്ക് ചെയ്യാം. കൂടാതെ രണ്ട് രാജ്യങ്ങളിലേയും ബസ് സ്റ്റേഷനുകളിലുള്ള ഔട്ട്ലെറ്റുകൾ വഴിയും ടിക്കറ്റുകൾ ലഭ്യമാകും.
ഇരു രാജ്യങ്ങളും തമ്മിലുള്ള ഗതാഗതം, ടൂറിസം തുടങ്ങിയ പ്രധാന മേഖലകളിൽ അന്താരാഷ്‌ട്ര ഗതാഗത ശൃംഖല ശക്തിപ്പെടുത്താനുള്ള സംയുക്ത ശ്രമങ്ങളുടെ ഭാഗമാണ് കരാറെന്ന് മുവാസലാത്ത് സി.ഇ.ഒ ബദർ ബിൻ മുഹമ്മദ് അൽ നദാബി പറഞ്ഞു. ഗതാഗതമേഖലയെ സഹായിക്കാനായി ഇരു രാജ്യങ്ങളുടെയും സഹകരണം ശക്തിപ്പെടുത്തുകയാണ് കരാറിലൂടെ ലക്ഷ്യമിടുന്നതെന്ന് എസ്.ആർ.ടി.എ ചെയർമാൻ എൻജിനീയർ യൂസഫ് ബിൻ ഖമീസ് അൽ അത്മാനിയും പറഞ്ഞു.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/KIGk615xlF1ILlMGxpUXqI
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
