March 14, 2024
March 14, 2024
ദോഹ: ഖത്തറിൽ അഗ്നി സുരക്ഷാ മേഖലയിൽ പൊതുജനങ്ങളുടെ സുരക്ഷ ഉറപ്പാക്കാൻ ആഭ്യന്തര മന്ത്രാലയം (MoI) സുരക്ഷാ മാർഗനിർദേശങ്ങൾ പങ്കുവെച്ചു. പൊതുജനങ്ങൾക്ക് അവരുടെ വീടുകളെയും പ്രിയപ്പെട്ടവരെയും സംരക്ഷിക്കുന്നതിന് നടപ്പിലാക്കാൻ കഴിയുന്ന നിരവധി പ്രധാനപ്പെട്ട അഗ്നി സുരക്ഷാ നടപടികൾ മന്ത്രാലയം വിശദീകരിച്ചു. അടുക്കളയുടെ സുരക്ഷ മുതൽ ഗ്യാസ് ചോർച്ച കൈകാര്യം ചെയ്യൽ വരെയുള്ള നിരവധി അടിയന്തര സാഹചര്യങ്ങളാണ് അധികൃതർ വിശദീകരിച്ചത്. അഗ്നി അപകടങ്ങൾ തടയുന്നതിനും, അടിയന്തര സാഹചര്യങ്ങൾ ഫലപ്രദമായി കൈകാര്യം ചെയ്യുന്നതിനുമാണ് മാർഗനിർദേശങ്ങളിലൂടെ ലക്ഷ്യമിടുന്നത്.
ശരിയായതും സാധുതയുള്ളതുമായ അഗ്നിശമന ഉപകരണം എല്ലാ വീട്ടിലും എളുപ്പത്തിൽ ലഭ്യമാകേണ്ടതിൻ്റെ പ്രാധാന്യം മന്ത്രാലയം ഊന്നിപ്പറഞ്ഞു. ചെറിയ തീപിടിത്തങ്ങൾ വലിയ അത്യാഹിതങ്ങളിലേക്ക് വ്യാപിക്കുന്നതിന് മുമ്പ് അത് തടയുന്നതിന് ഈ അവശ്യ ഉപകരണങ്ങൾ സഹായകമാകും. ചൂടുള്ള പ്രതലങ്ങളിലോ ഇലക്ട്രിക്കൽ വീട്ടുപകരണങ്ങൾക്കരികിലോ കുട്ടികളെ വിടാതിരിക്കേണ്ടതിൻ്റെ പ്രാധാന്യത്തെ കുറിച്ചും അധികൃതർ വ്യക്തമാക്കി.
കൂടാതെ, എരിയുന്ന എണ്ണ ചട്ടി വെള്ളം ഉപയോഗിച്ച് കെടുത്താൻ ശ്രമിക്കുന്നതിനുപകരം ഒരു ലിഡ് അല്ലെങ്കിൽ പുതപ്പ് കൊണ്ട് മൂടുക തുടങ്ങിയ പാചകവുമായി ബന്ധപ്പെട്ട മാർഗ്ഗനിർദ്ദേശങ്ങളും മന്ത്രാലയം വിശേദീകരിച്ചു. അയഞ്ഞ വസ്ത്രങ്ങൾ തീ പിടിക്കാനുള്ള സാധ്യത വർദ്ധിപ്പിക്കുന്നതിനാൽ, പാചകം ചെയ്യുമ്പോൾ ഒഴുകുന്നതോ കത്തുന്നതോ ആയ വസ്ത്രങ്ങൾ ധരികാതിരിക്കുക. കത്തുന്ന ചവറ്റുകുട്ടകൾ നനഞ്ഞ തുണികൊണ്ട് മൂടണം. ഇത് പോലുള്ള കത്തുന്ന വസ്തുക്കൾ ശരിയായ രീതിയിൽ നീക്കം ചെയ്യുന്നത് തീ പടരുന്നത് തടയാൻ കഴിയും.
ഗ്യാസ് ദുർഗന്ധം കണ്ടെത്തിയാൽ വാതിലുകളും ജനലുകളും തുറന്ന് പ്രദേശം വായുസഞ്ചാരമുള്ളതാക്കാൻ പൊതുജനങ്ങൾക്ക് നിർദേശമുണ്ട്. അതേസമയം തീപിടുത്തത്തിന് കാരണമാകുന്ന ഇഗ്നിഷൻ സ്രോതസ്സുകളോ ഇലക്ട്രിക്കൽ ഉപകരണങ്ങളോ ഉപയോഗിക്കുന്നതിൽ നിന്ന് വിട്ടുനിൽക്കാനും നിർദേശമുണ്ട്.
ജീവനും സ്വത്തുക്കളും സംരക്ഷിക്കുന്നതിൽ ജാഗ്രതയുടെയും തയ്യാറെടുപ്പിൻ്റെയും പ്രാധാന്യത്തിൻ്റെ സമയോചിതമായ ഓർമ്മപ്പെടുത്തലാണ് ഈ സുരക്ഷാ മാർഗ്ഗനിർദ്ദേശങ്ങളെന്ന് അധികൃതർ വ്യക്തമാക്കി. അടിയന്തര സാഹചര്യമുണ്ടായാൽ, പരിഭ്രാന്തരാകേണ്ടതില്ലെന്നും, 999 എന്ന നമ്പറിൽ വിളിച്ചോ ബധിരരുടെ അടിയന്തര സേവന നമ്പറായ 992 ഉപയോഗിച്ചോ അടിയന്തര സേവനങ്ങളുമായി ബന്ധപ്പെടണമെന്ന് മന്ത്രാലയം പൊതുജനങ്ങളെ ഓർമ്മിപ്പിച്ചു.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/IocT7PQnr4MEYpMCPpqwIn
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
