April 14, 2024
April 14, 2024
ടെഹ്റാൻ: ആക്രമണങ്ങൾക്കെതിരെ ഇസ്രായേൽ തിരിച്ചടിച്ചാൽ കൂടുതൽ ശക്തമായ ആക്രമണം നടത്തുമെന്ന് ഇറാൻ മുന്നറിയിപ്പ് നൽകി.
“ഇറാനെതിരെ ഇസ്രായേൽ തിരിച്ചടിച്ചാൽ ഞങ്ങളുടെ പ്രതികരണം ഇന്നലെ (ശനി) രാത്രിയിലെ സൈനിക നടപടിയേക്കാൾ വളരെ വലുതായിരിക്കും,” ഇറാൻ സായുധ സേനാ മേധാവി മേജർ ജനറൽ മുഹമ്മദ് ബഗേരി സ്റ്റേറ്റ് ടിവിയോട് പറഞ്ഞു. ഇസ്രയേലിനെ പിന്തുണയ്ക്കുന്നതിനോ, മേഖലയിലെ തങ്ങളുടെ താവളങ്ങൾ ലക്ഷ്യമിടുന്നതിനെതിരെയോ ഇറാൻ വാഷിംഗ്ടണിന് മുന്നറിയിപ്പ് നൽകിയിട്ടുണ്ടെന്നും ബാഗേരി കൂട്ടിച്ചേർത്തു.
ഈ മാസം ആദ്യം സിറിയൻ തലസ്ഥാനമായ ദമാസ്കസിലെ കോൺസുലർ കെട്ടിടത്തിന് നേരെ ഇസ്രായേൽ നടത്തിയ ആക്രമണത്തിന് തിരിച്ചടിയായാണ് ഇറാൻ ആക്രമണം നടത്തിയത്. ഇസ്രയേലിന്റെ ആക്രമണത്തിൽ രണ്ട് മുതിർന്ന കമാൻഡർമാർ ഉൾപ്പെടെ ഇറാൻ്റെ ഏഴ് റെവല്യൂഷണറി ഗാർഡ് ഓഫീസർമാർ കൊല്ലപ്പെട്ടിരുന്നു.
ഇസ്രായേലിനെ ആക്രമിക്കാൻ ഇറാന് ഇനി തുടർ പദ്ധതിയില്ലെന്നും ദമാസ്കസ് കോൺസുലേറ്റിന് നേരെയുണ്ടായ ആക്രമണത്തോടുള്ള പ്രതികരണം അവസാനിപ്പിച്ചതായി കരുതുന്നതായും ബാഗേരി പറഞ്ഞു.
ഇറാൻ്റെ ഡ്രോണുകളും മിസൈലുകളും 99 ശതമാനവും തകർത്തതായി ഇസ്രായേൽ സൈന്യവും സഖ്യകക്ഷികളും പറഞ്ഞതിന് പിന്നാലെ, തൻ്റെ രാജ്യം വിജയം കൈവരിക്കുമെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു ഊന്നിപ്പറഞ്ഞു. സഖ്യകക്ഷികളുമായി തുടർനടപടികൾ ചർച്ച ചെയ്യുകയാണെന്നും നെതന്യാഹു വ്യക്തമാക്കി.
“ഞങ്ങൾ തടഞ്ഞു, ഞങ്ങൾ പിന്തിരിപ്പിച്ചു, ഒരുമിച്ച് ഞങ്ങൾ വിജയിക്കും,” നെതന്യാഹു എക്സിൽ കുറിച്ചു.
ആക്രമണം പരാജയപ്പെടുത്തിയിട്ടും സൈനിക പ്രചാരണം അവസാനിച്ചിട്ടില്ലെന്നും എല്ലാ സാഹചര്യങ്ങൾക്കും ഇസ്രായേൽ തയ്യാറാകണമെന്നും ഇസ്രായേൽ പ്രതിരോധ മന്ത്രി യോവ് ഗാലൻ്റ് പറഞ്ഞു. നെതന്യാഹു തൻ്റെ യുദ്ധ കാബിനറ്റിനെ കണ്ടുമുട്ടിയതിനാൽ ആക്രമണത്തിന് തിരിച്ചടിയുണ്ടാകുമെന്ന് ഇസ്രായേലി ഉദ്യോഗസ്ഥനെ ഉദ്ധരിച്ച് ഇസ്രായേലിൻ്റെ ചാനൽ 12 ടിവി റിപ്പോർട്ട് ചെയ്തു.
ഇസ്രായേലിനെ ആക്രമിക്കാനായി 185 ഡ്രോണുകളും 36 ക്രൂയിസ് മിസൈലുകളും 110 ഭൂതല മിസൈലുകളുമാണ് ഇറാൻ ഉപയോഗിച്ചതെന്നാണ് റിപ്പോർട്ട്. തെൽ അവീവ്, ജറൂസലം ഉൾപ്പെടെ ഇസ്രായേൽ നഗരങ്ങളിൽ വ്യോമാക്രമണ സൈറണുകളും സ്ഫോടന ശബ്ദങ്ങളും ഉണ്ടായിരുന്നു. കൂടാതെ ഇറാഖിൽ നിന്നും യെമനിൽ നിന്നും ഏതാനും മിസൈലുകൾ വിക്ഷേപിച്ചതായും റിപ്പോർട്ടുണ്ട്. ഇറാന്റെ ആക്രമണം അഞ്ച് മണിക്കൂർ നീണ്ടുനിന്നതായാണ് വിവരം.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/Iq3CVicSDrS1LvIBvvkToc
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F