March 06, 2024
March 06, 2024
ദുബായ്: യു.എ.ഇയിൽ ഇന്ത്യക്കാരായ ബ്ലൂകോളർ തൊഴിലാളികൾക്ക് ലൈഫ് ഇൻഷുറൻസ് പോളിസി പദ്ധതിയുമായി ദുബായ് ഇന്ത്യൻ കോൺസുലേറ്റ്. 37 ദിർഹം വാർഷിക പ്രീമിയം അടച്ചാൽ അപകടത്തിലോ സ്വാഭാവികമായോ മരണപ്പെടുന്ന പ്രവാസിയുടെ ബന്ധുക്കൾക്ക് 35,000 ദിർഹം വരെ സാമ്പത്തിക സഹായം ലഭിക്കും. 24 മണിക്കൂർ ആഗോള പരിരക്ഷയും ഇൻഷുറൻസ് ഉറപ്പുനൽകുന്നുണ്ട്. പ്രവാസിയുടെ മൃതദേഹം നാട്ടിലെത്തിക്കുന്നതിന് 12,000 ദിർഹം വരെ സഹായം ലഭിക്കും. അപകടത്തിൽ ഭാഗികമായോ പൂർണമായോ അംഗ വൈകല്യം സംഭവിച്ചാലും ഇൻഷുറൻസ് പരിരക്ഷ ഉണ്ടായിരിക്കും. 18 മുതൽ 70 വയസ് വരെ പ്രായമുള്ളവർക്ക് ഗുണഭോക്താക്കളാകാം.
മൂന്ന് പ്ലാനുകളിലായാണ് ഇൻഷുറൻസ് കവറേജ്. 35,000 ദിർഹത്തിന്‍റെ പ്ലാനിൽ 37 ദിർഹമാണ് വാർഷിക പ്രീമിയം. 50,000 ദിർഹത്തിന്‍റെ കവറേജിന് 50 ദിർഹവും 75,000 ദിർഹത്തിന്‍റെ കവറേജിന് 72 ദിർഹവുമാണ് വാർഷിക പ്രീമിയം.
ഇന്ത്യയിലെ പ്രമുഖ ഇൻഷുറൻസ് കമ്പനികളായ ഖർഗാസ് ഇൻഷുറൻസ് സർവീസസ് എൽ.എൽ.സി, ഓറിയന്‍റ് ഇൻഷുറൻസ് പി.ജെ.എസ്.സി എന്നീ കമ്പനികളാണ് പദ്ധതി അവതരിപ്പിച്ചതെന്ന് ഇന്ത്യൻ കോൺസുലേറ്റ് വാർത്തക്കുറിപ്പിൽ അറിയിച്ചു. മാർച്ച് ഒന്ന് മുതൽ ലൈഫ് ഇൻഷുറൻസ് പ്ലാൻ പ്രാബല്യത്തിൽ വന്നു. അതേസമയം, ഇൻഷുറൻസിന്‍റെ പരിധികളും മറ്റ് നിബന്ധനകളും സംബന്ധിച്ച് അതത് കമ്പനികളുമായി ചർച്ച ചെയ്ത് തീരുമാനിക്കണം. കൂടുതൽ വിവരങ്ങൾക്ക് lifeprotect@gargashinusurance.com എന്ന ഇ-മെയിൽ വിലാസത്തിലോ 0527172944/0526167787 എന്ന നമ്പറുകളിലോ ബന്ധപ്പെടാം.
യു.എ.ഇയിലെ ഇന്ത്യൻ തൊഴിൽ സമൂഹത്തിന്‍റെ ക്ഷേമത്തിനാണ് കോൺസുലേറ്റ് പ്രാധാന്യം നൽകുന്നതെന്ന് പദ്ധതി പ്രഖ്യാപിച്ചുകൊണ്ട് കോൺസൽ ജനറൽ സതീഷ് കുമാർ ശിവൻ പറഞ്ഞു. 35 ലക്ഷം ഇന്ത്യക്കാർ യു.എ.ഇയിൽ തൊഴിൽ ചെയ്യുന്നുണ്ടെന്നാണ് കണക്ക്. ഇതിൽ 65 ശതമാനം പേരും ബ്ലൂ കോളർ തൊഴിലാളികളാണ്. യു.എ.ഇയിലെ ഏറ്റവും വലിയ തൊഴിൽ വിഭാഗമാണിത്.
2022ൽ ദുബായ് ഇന്ത്യൻ കോൺസുലേറ്റിൽ 1,750 മരണ കേസുകളാണ് രജിസ്റ്റർ ചെയ്തത്. ഇതിൽ ഏകദേശം 1,100 പേർ തൊഴിലാളികളാണ്. 2023ൽ ആകെ രജിസ്റ്റർ ചെയ്ത 1,513 മരണങ്ങളിൽ 1,000 എണ്ണം തൊഴിലാളികളുടെതാണ്. ഇതിൽ 90 ശതമാനത്തിലധികവും മരണകാരണം സ്വാഭാവികമാണെന്ന് കണ്ടെത്തിയിട്ടുണ്ടെന്നും കോൺസൽ ജനറൽ പറഞ്ഞു. കമ്പനികൾ ജീവനക്കാരുടെ പേരിൽ ആരോഗ്യ ഇൻഷുറൻസ് എടുക്കാറുണ്ടെങ്കിലും സ്വാഭാവിക മരണത്തിന് ബന്ധുക്കൾക്ക് സാമ്പത്തിക സഹായം ലഭിക്കാറില്ല. ഈ സാഹചര്യത്തിലാണ് ലൈഫ് ഇൻഷുറൻസ് പദ്ധതി അവതരിപ്പിച്ചതെന്നും കോൺസൽ ജനറൽ പറഞ്ഞു.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/IocT7PQnr4MEYpMCPpqwIn
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
