February 28, 2024
February 28, 2024
അബൂദാബി: സായിദ് അന്താരാഷ്ട്ര വിമാനത്താവളത്തില്‍ അടിയന്തര വൈദ്യസഹായം ലഭ്യമാക്കുന്ന സൗജന്യ മെഡിക്കൽ ക്ലിനിക്ക് ആരംഭിച്ചു. ബുർജീൽ ഹോൾഡിങ്സുമായി സഹകരിച്ചാണ് ക്ലിനിക്ക് പ്രവർത്തിക്കുന്നത്. ഇത് സംബന്ധിച്ച കരാറിൽ എയര്‍പോര്‍ട്ട് മാനേജിങ് ഡയറക്ടറും സി.ഇ.ഒയുമായ എലിന സോര്‍ലിനിയും ബുര്‍ജീല്‍ ഹോള്‍ഡിങ്‌സ് ചെയര്‍മാനായ ഡോ. ഷംഷീര്‍ വയലിലും ഒപ്പുവെച്ചു. 24 മണിക്കൂറും പ്രവര്‍ത്തിക്കുന്ന ക്ലിനിക്കിന്‍റെ പ്രവര്‍ത്തനം ബുര്‍ജീല്‍ മെഡിക്കല്‍ സിറ്റിയുടെ നേതൃത്വത്തിലായിരിക്കും നടത്തുക.
വിമാനത്താവളത്തില്‍ നിന്ന് പുറത്തുപോവാതെ യാത്രക്കാർക്ക് അടിയന്തര ചികിത്സ തേടാന്‍ ക്ലിനിക്ക് സഹായകമാവും. ആശുപത്രിയിലേക്ക് മാറ്റുന്നതിന് മുമ്പ് യാത്രക്കാർക്ക് പ്രാഥമിക ചികിത്സ നല്‍കി രോഗിയുടെ നില ഭദ്രമാക്കാന്‍ ക്ലിനിക്കിലെ സേവനം സഹായിക്കും. ആശുപത്രിയിലെ ചികിത്സ ആവശ്യമുള്ളവരെ ബി.എം.സിയുടെ സമീപ കേന്ദ്രങ്ങളിലെത്തിക്കും. അബൂദാബി വിമാനത്താവളത്തിലെ ജീവനക്കാര്‍ക്കും അവരുടെ കുടുംബാംഗങ്ങള്‍ക്കും ക്ലിനിക്കിലെ സേവനം ലഭ്യമാണ്.
ഓരോ യാത്രികന്‍റെയും യാത്രയുടെ അവിഭാജ്യ ഭാഗമാവാന്‍ ഇതിലൂടെ ബുര്‍ജീല്‍ മെഡിക്കല്‍ സിറ്റിക്കാവുമെന്ന് ഡോ. ഷംഷീര്‍ വയലില്‍ പറഞ്ഞു. ബുര്‍ജീല്‍ ഹോള്‍ഡിങ്‌സ് സി.ഇ.ഒ ജോണ്‍ സുനില്‍, ഗ്രൂപ് സി.ഒ.ഒ സഫീര്‍ അഹമ്മദ്, ബോര്‍ഡ് ഓഫ് ഡയറക്ടേഴ്‌സ് അംഗം ഒമ്രാന്‍ അല്‍ ഖൂരി, ബുര്‍ജീല്‍ ഹോള്‍ഡിങ്‌സ് ചീഫ് കോര്‍പറേറ്റ് ഓഫിസര്‍ ഹമദ് അല്‍ ഹൊസനി, ബി.എം.സി ഡെപ്യൂട്ടി സി.ഇ.ഒ ഐഷ അല്‍ മഹിരി എന്നിവര്‍ സംബന്ധിച്ചു.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/IocT7PQnr4MEYpMCPpqwIn
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
