January 15, 2024
January 15, 2024
ദുബായ്: ദുബായിൽ കനത്ത മഴയിൽ തെരുവുകളും റോഡുകളും ഉണ്ടാകുന്ന വെള്ളക്കെട്ടുകൾ നിരീക്ഷിക്കാനും, അടിയന്തര നടപടികൾ സ്വീകരിക്കാനുമായി ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (ആർ.ടി.എ) പ്രളയ നിയന്ത്രണ കേന്ദ്രം ആരംഭിച്ചു. നൂറുകണക്കിന് നിരീക്ഷണ കാമറകൾ, ഹീറ്റ് മാപ്പുകൾ (വെള്ളം കെട്ടി നിൽക്കുന്ന പ്രദേശങ്ങൾ തിരിച്ചറിയുന്നതിന് സഹായിക്കുന്ന സംവിധാനം), കാലാവസ്ഥ പ്രവചന സംവിധാനങ്ങൾ തുടങ്ങിയ അത്യാധുനിക സാങ്കേതിക വിദ്യകൾ ഉപയോഗിച്ചാണ് പുതിയ കേന്ദ്രത്തിന്റെ പ്രവർത്തനം. പ്രളയത്തെ തുടർന്നുള്ള ഗതാഗത തടസ്സങ്ങൾ നേരിടുന്നതിനായുള്ള അടിയന്തര പദ്ധതികൾ, രക്ഷാ പ്രവർത്തകരെ നിയോഗിക്കൽ, ആവശ്യമായ വസ്തുക്കൾ അനുവദിക്കൽ തുടങ്ങിയവ നിരീക്ഷിക്കുകയും നിയന്ത്രിക്കുകയുമാണ് പുതിയ കേന്ദ്രത്തിന്റെ ചുമതല. വെള്ളക്കെട്ട് മൂലമുണ്ടാകുന്ന അടിയന്തര സാഹചര്യങ്ങൾ വേഗത്തിൽ നേരിടുന്നതിനാണ് പുതിയ സംവിധാനം.
മെച്ചപ്പെട്ട കാലാവസ്ഥ പ്രവചന വിവരങ്ങൾ ലഭ്യമാക്കുന്നതിന് ആർ.ടി.എ ദേശീയ കാലാവസ്ഥ നിരീക്ഷണ കേന്ദ്രവുമായും (എൻ.സി.എം) സഹകരിച്ച് പ്രവർത്തിക്കും. ഇതുവഴി രക്ഷാപ്രവർത്തകരെ സജ്ജമാക്കുന്നതിനും പൊതുജനങ്ങൾക്ക് അതിവേഗത്തിൽ മുന്നറിയിപ്പ് നൽകുന്നതിനും സാധിക്കും. കാലാവസ്ഥ വ്യതിയാനം നേരിടുന്നതിനായുള്ള സമഗ്ര പ്രതികരണ പദ്ധതികൾ ഒരുക്കുന്നതിന് വിവിധ സ്ഥാപനങ്ങളിലെ പ്രതിനിധികൾ അടങ്ങിയ പ്രത്യേക ടീമിനേയും രൂപവത്കരിച്ചിട്ടുണ്ട്. ദുരന്ത നിവാരണ സ്ഥലങ്ങളിൽ നടക്കുന്ന പ്രവർത്തനങ്ങൾ നിരീക്ഷിച്ച് യഥാസമയം വിവരങ്ങൾ ആർ.ടി.എക്ക് കൈമാറാനുള്ള 'സിറ്റഡൽ കമ്യൂണിക്കേഷൻ പ്ലാറ്റ്ഫോമും' പുതിയ കേന്ദ്രത്തിൽ ഒരുക്കിയിട്ടുണ്ട്. റോഡുകളിൽ സ്ഥാപിച്ചിട്ടുള്ള സ്ക്രീനുകളിലൂടെ വെള്ളക്കെട്ട് സമയങ്ങളിൽ ഡ്രൈവർമാർക്ക് മുന്നറിയിപ്പ് നൽകും. നിരീക്ഷണ കാമറകളിൽ നിന്നുള്ള വീഡിയോ ദൃശ്യങ്ങളും ലൈവായി സ്ക്രീനുകളിൽ സംപ്രേഷണം ചെയ്യും.
കഴിഞ്ഞ വർഷം നവംബറിലുണ്ടായ ശക്തമായ മഴയിൽ വെള്ളം കയറിയതിനെ തുടർന്ന് ദുബായിലെ ചില പ്രധാന റോഡുകളിൽ ആറു മണിക്കൂർ വരെ ഗതാഗത തടസ്സപ്പെട്ടിരുന്നു. താഴ്ന്ന പ്രദേശങ്ങളിലെ റോഡുകളാണ് കൂടുതൽ പ്രതിസന്ധി നേരിട്ടത്. റോഡിലെ വെള്ളക്കെട്ടിൽ അകപ്പെട്ട് നിരവധി വാഹനങ്ങൾക്ക് കേടുപാടുകളും സംഭവിച്ചിരുന്നു.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/KIGk615xlF1ILlMGxpUXqI
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F