March 14, 2023
March 14, 2023
ന്യൂസ്‌റൂം ബ്യൂറോ
അബുദാബി: ആരോഗ്യ രംഗത്ത് പ്രവര്‍ത്തിക്കുന്ന ഏറ്റവും സ്വാധീനമുള്ള 100 പേരുടെ ഫോബ്‌സ് റാങ്കിംഗില്‍ ഇടംപിടിച്ച് പ്രവാസി സംരംഭകന്‍ ഡോ. ഷംഷീര്‍ വയലില്‍. മിഡിലീസ്റ്റിലെ ഫോബ്‌സ് റാങ്കിംഗില്‍ ആദ്യ പത്തിലെത്തുന്ന ഇന്ത്യക്കാരന്‍ കൂടിയാണ് മലയാളിയായ ഡോ. ഷംഷീര്‍ വയലില്‍. ബുര്‍ജീല്‍ ഹോള്‍ഡിങ്‌സ് സ്ഥാപകനും ചെയര്‍മനുമാണ്.
മിഡിലീസ്റ്റിലെ ഏറ്റവും വലുതും സ്വാധീനമുള്ളതുമായ ആരോഗ്യസ്ഥാപനങ്ങള്‍ക്ക് നേതൃത്വം നല്‍കുന്നവരെ ഉള്‍പ്പെടുത്തിയാണ് ഫോബ്‌സ് പട്ടിക തയാറാക്കിയത്. ബിസിനസ്സിന്റെ വലുപ്പം, വരുമാനം, ആസ്തി, പ്രവര്‍ത്തനങ്ങളുടെ വൈവിധ്യം, അനുഭവസമ്പത്ത്, സ്വാധീനം, നേട്ടങ്ങള്‍ എന്നിവ വിലയിരുത്തിയാണ് റാങ്കിംഗ്. മിഡിലീസ്റ്റിലെ ഏറ്റവും വലിയ ആരോഗ്യ സേവനദാതാലായ ബുര്‍ജീല്‍ ഹോള്‍ഡിംഗ്‌സ് കഴിഞ്ഞ അബുദാബി സെക്യൂരിറ്റിസ് എക്‌സ്‌ചേഞ്ചില്‍ ലിസ്റ്റ് ചെയ്തതോടെ ഡോ. ഷംഷീറിന്റെ ആസ്തി 2.3 ബില്യണ്‍ ഡോളറായി ഉയര്‍ന്നുവെന്ന് ഹോബ്‌സ് റിപ്പോര്‍ട്ടില്‍ പറയുന്നു.
മിഡിലീസ്റ്റില്‍ 16 ആശുപത്രികളും 23 മെഡിക്കല്‍ സെന്റ്‌റുകളുമാണ് ബുര്‍ജീല്‍ ഹോള്‍ഡിംഗ്‌സിന് കീഴിലുള്ളത്. ഓണ്‍സൈറ്റ് മെഡിക്കല്‍ സേവന ദാതാവായ ആര്‍.പി.എം, പ്രമുഖ ഔഷധ ഉല്പാദന കമ്പനിയായ ലൈഫാര്‍മ എന്നിവയുടെ സ്ഥാപകനും വിദ്യാഭ്യാസ നിക്ഷേപ സ്ഥാപനമായ അമാനത് ഹോള്‍ഡിങ് സിന്റെവൈസ് ചെയര്‍മാനുമാണ് ഡോ. ഷംഷീര്‍ വയലില്‍
