September 06, 2021
September 06, 2021
അജ്മാന്: കോവിഡ് പ്രതിസന്ധിയെ തുടര്ന്ന് കഴിഞ്ഞ വര്ഷം ഏപ്രിലില് നിര്ത്തിവെച്ച അജ്മാനില്നിന്ന് അബൂദബിയിലേക്കുള്ള ബസ് സര്വിസുകള് പുനരാരംഭിച്ചു. ബസ് സര്വിസുകള് സെപ്റ്റംബര് അഞ്ച് ഞായറാഴ്ച മുതലാണ് പുനരാരംഭിച്ചത്. ഇതോടെ യാത്രക്കാര്ക്ക് അജ്മാന് മുസല്ലയിലെ ബസ് സ്റ്റേഷനില് നിന്നും അബൂദബിയിലേക്ക് യാത്ര തിരിക്കാം.
ഒരാള്ക്ക് ടിക്കറ്റിന് 35 ദിര്ഹമാണ് ഈടാക്കുന്നത്. എന്നാല്, മസാര് കാര്ഡ് ഉപയോഗിക്കുന്നവര്ക്ക് 30 ദിര്ഹം നല്കിയാല് മതി. അജ്മാനില്നിന്നു നാലു സര്വിസുകള് ഉണ്ടായിരുന്നത് തല്ക്കാലം രണ്ടു സര്വിസുകളാക്കി കുറച്ചിട്ടുണ്ട്.
ആദ്യ ബസ് അജ്മാനില്നിന്ന് രാവിലെ ഏഴിനും അവസാനത്തേത് വൈകുന്നേരം ആറിനും പുറപ്പെടും. അബൂദബിയില് നിന്നുള്ള ആദ്യ യാത്ര രാവിലെ 10നും അവസാനത്തേത് രാത്രി ഒമ്ബതിനുമായിരിക്കും പുറപ്പെടുക. ദേശീയ ദുരന്തനിവാരണ അതോറിറ്റിയുടെ ഏറ്റവും പുതിയ നിബന്ധനകള്ക്കനുസൃതമായാണ് ബസ് സര്വിസ് പുനരാരംഭിക്കുന്നതെന്ന് അജ്മാന് പബ്ലിക് ട്രാന്സ്പോര്ട്ട് അതോറിറ്റി എക്സിക്യൂട്ടിവ് ഡയറക്ടര് എന്ജിനീയര് സാമി അലി അല് ജല്ലാഫ് പറഞ്ഞു. അജ്മാനിലെ അല് മുസല്ല സ്റ്റേഷനില്നിന്ന് യാത്രക്കാരെ കയറ്റി അബൂദബി എമിറേറ്റില് നേരിട്ട് ഇറക്കുകയാണ്.
അജ്മാന് എമിറേറ്റില്നിന്ന് പുറപ്പെട്ട ശേഷം പിന്നീട് യാത്രക്കാരെ കയറ്റില്ല. ഓരോ യാത്രക്കുശേഷവും ബസ് അണുമുക്തമാക്കുകയും ബസില് കയറുന്നതിനുമുമ്ബ് യാത്രക്കാരെ തെര്മല് പരിശോധനക്ക് വിധേയമാക്കുകയും ചെയ്യുന്നുണ്ട്.
പൊതുഗതാഗത ബസ് ഉപയോക്താക്കളുടെ ആരോഗ്യവും സുരക്ഷയും സംരക്ഷിക്കുന്നതിന് യാത്രക്കാര് ദേശീയ ദുരന്തനിവാരണ അതോറിറ്റി പ്രഖ്യാപിച്ച മാനദണ്ഡങ്ങള് പാലിക്കണം.