January 31, 2022
January 31, 2022
അബുദാബി : അബുദാബിയെ ലക്ഷ്യമാക്കി ഹൂത്തികൾ അയച്ച ബാലിസ്റ്റിക്ക് മിസൈൽ നശിപ്പിച്ചതായി യു.എ.ഇ പ്രതിരോധ മന്ത്രാലയം അറിയിച്ചു. ഹൂത്തികളുടെ മിസൈൽ ലോഞ്ചർ, പ്രത്യാക്രമണത്തിലൂടെ തകർത്തതായും യു.എ. ഇ സൈന്യം അറിയിച്ചു. രണ്ടാഴ്ചക്കിടെ ഇത് മൂന്നാം തവണയാണ് യമനിലെ വിമതപോരാളികളായ ഹൂത്തികൾ അബുദാബി ആക്രമിക്കുന്നത്. ജനുവരി 17 ന് നടന്ന ആക്രമണത്തിൽ ഇന്ത്യക്കാരടക്കം 3 പേർ കൊല്ലപ്പെട്ടിരുന്നു.
നയതന്ത്ര ചർച്ചകൾക്കായി ഇസ്രായേൽ പ്രസിഡന്റ് ഇസാക്ക് ഹെർസോഗ് അബുദാബിയിൽ എത്തിയതിന് പിന്നാലെയാണ് ഇന്നലെ ആക്രമണം നടന്നത്. പ്രാദേശിക സമയം രാത്രി 12.20 നാണ് ഹൂത്തികൾ ബാലിസ്റ്റിക്ക് മിസൈൽ വിക്ഷേപിച്ചത്. എന്നാൽ, നൂതന സംവിധാനങ്ങൾ ഉപയോഗിച്ച് ഈ മിസൈലിനെ ആകാശത്ത് വെച്ച് തന്നെ തകർക്കാൻ യു.എ.ഇ. ക്ക് കഴിഞ്ഞു. മിസൈലിന്റെ അവശിഷ്ടങ്ങൾ ആളൊഴിഞ്ഞ സ്ഥലത്താണ് പതിച്ചതെന്നും പരിക്കോ നാശനഷ്ടങ്ങളോ ഇല്ലെന്നും സേന അറിയിച്ചു.