November 09, 2021
November 09, 2021
അബുദാബി : യുഎഇയുടെ ഔദ്യോഗിക വാക്സിൻ രജിസ്ട്രേഷൻ അപ്ലികേഷനായ അൽ ഹൊസനിൽ വിദേശത്ത് നിന്ന് വാക്സിൻ സ്വീകരിച്ചവർക്കും രജിസ്റ്റർ ചെയ്യാം. പൊതു ഇടങ്ങളിൽ പ്രവേശിക്കാൻ അൽ ഹൊസനിലെ ഗ്രീൻ പാസ് നിർബന്ധമായതിനാൽ, സ്വന്തം രാജ്യത്ത് നിന്നും വാക്സിൻ സ്വീകരിച്ച് അബുദാബിയിൽ എത്തിയവർക്ക് ഏറെ ഉപകാരപ്രദമാണ് ഈ ഭേദഗതി.
യുഎഇ അംഗീകരിച്ച വാക്സിനുകളായ ഫിസർ, സിനോഫാം, സ്പുട്നിക്ക്, ഓക്സ്ഫോഡ് മോഡേണ, കോവിഷീൽഡ് സിനോവാക് എന്നീ വാക്സിനുകൾ എടുത്തവർക്കാണ് അൽ ഹൊസനിൽ രജിസ്റ്റർ ചെയ്യാൻ കഴിയുക. ഒക്ടോബർ 1 2020ന് മുൻപായിരിക്കണം വാക്സിനേഷൻ സ്വീകരിച്ചത്. വാക്സിൻ സ്വീകരിച്ച ആളുടെ പേരും, എമിറേറ്റ്സ് ഐഡിയുടെയോ പാസ്പോർട്ടിന്റെയോ നമ്പറും ഉൾപെടുത്തിയിരിക്കണം. വാക്സിന്റെ പേര്, ബാച്ച് നമ്പർ, സ്വീകരിച്ച സ്ഥലം, രാജ്യം എന്നിവയും രേഖപ്പെടുത്തണം. ശേഷം, അബുദാബിയിലെ അംഗീകൃത മെഡിക്കൽ സെന്ററുകളിൽ ഒന്ന് സന്ദർശിച്ച്, മെഡിക്കൽ പരിശോധന നടത്തണം. ഈ നടപടികൾ പൂർത്തിയാക്കിയാൽ അപ്ലിക്കേഷനിൽ ഗ്രീൻ പാസ് ലഭിക്കും. ഇവ കാണിച്ച് പൊതു ഇടങ്ങളിൽ പ്രവേശനം നേടാം. പാസിലെ കളർ ചുവപ്പായാൽ കോവിഡ് രോഗി ആണെന്നാണ് അർത്ഥം. പാസ് ചാരനിറമായി മാറിയാൽ വീണ്ടും പീസീആർ ടെസ്റ്റ് നടത്തി ഗ്രീൻ പാസ് സ്വന്തമാക്കാവുന്നതാണ്.