March 19, 2022
March 19, 2022
ദുബായ് : കോവിഡ് പ്രതിസന്ധി ഉടലെടുത്തതോടെ പ്രഖ്യാപിച്ച യാത്രാ വിലക്കുകൾ അവസാനിപ്പിക്കാൻ ഇന്ത്യ തീരുമാനിച്ചതോടെ, ഗൾഫ് വിമാന സർവീസുകൾ പഴയപടിയാവും. എയർ ഇന്ത്യ, എയർ ഇന്ത്യ എക്സ്പ്രസ് തുടങ്ങിയ വിമാനസർവീസുകൾ യു.എ.ഇ യിലേക്ക് പഴയ ഷെഡ്യൂളിലേക്ക് മടങ്ങുമെന്ന് അറിയിച്ചിട്ടുണ്ട്.
മുൻപ് വ്യാഴാഴ്ച മാത്രം സർവീസ് നടത്തിയിരുന്ന അൽ ഐൻ - കോഴിക്കോട് എയർ ഇന്ത്യ വിമാനം ഇനിമുതൽ ആഴ്ചയിൽ രണ്ട് ദിവസം സർവീസ് നടത്തും. ഞായർ, വ്യാഴം ദിവസങ്ങളിൽ ഉച്ചയ്ക്ക് 2.20 നാണ് ഈ വിമാനം പുറപ്പെടുക. ഷാർജയിൽ നിന്നും കോഴിക്കോടേക്കുള്ള എയർ ഇന്ത്യ വിമാനം മാർച്ച്‌ 28 മുതൽ സർവീസ് പുനരാരംഭിക്കും. അബുദാബിയിൽ നിന്നും കേരളത്തിലേക്കുള്ള എയർ ഇന്ത്യ എക്സ്പ്രസ് സർവീസുകളുടെ സമയവും അധികൃതർ പ്രഖ്യാപിച്ചു. കണ്ണൂരിലേക്ക് ഉച്ചക്ക് ഒരുമണിക്കും, തിരുവനന്തപുരത്തേക്ക് രാത്രി 9.10 നും, കോഴിക്കോടേക്ക് അർധരാത്രി 12.20 നും ആയിരിക്കും വിമാനങ്ങൾ പുറപ്പെടുക. ദുബായിൽ നിന്ന് കൊച്ചി, കോഴിക്കോട്, ചെന്നൈ, ഡൽഹി, ഹൈദരാബാദ്, മുംബൈ, എന്നീ സെക്ടറുകളിലേക്ക് എയർ ഇന്ത്യ പ്രതിദിന സർവീസ് നടത്തും.
