November 25, 2021
November 25, 2021
ദോഹ : ഫിഫ അറബ് കപ്പിന്റെ ആദ്യദിനത്തിൽ രണ്ട് ലോകകപ്പ് സ്റ്റേഡിയങ്ങൾ ഉദ്ഘാടനം ചെയ്യപ്പെടും. അൽ ബെയ്ത്ത്, സ്റ്റേഡിയം 974 എന്നീ സ്റ്റേഡിയങ്ങളാണ് അറബ് കപ്പിനോട് അനുബന്ധിച്ച് ഉദ്ഘാടനം ചെയ്യപ്പെടുക. അറബ് ഭൂഖണ്ഡത്തിലെ 16 മുൻനിര ടീമുകളാണ് ടൂർണമെന്റിൽ മാറ്റുരയ്ക്കുന്നത്.
അൽ ബൈത്തിലെ ആദ്യമത്സരത്തിൽ ആതിഥേയരായ ഖത്തർ ബഹ്റൈനെ നേരിടും. പ്രാദേശിക സമയം 7:30 നാണ് മത്സരം. സ്റ്റേഡിയം 974 ലെ ഉദ്ഘാടനമത്സരത്തിൽ സിറിയയും യുഎഇയുമാണ് ഏറ്റുമുട്ടുന്നത്. ഗ്രൂപ്പ് ഘട്ടത്തിൽ നിന്നും എട്ട് ടീമുകൾ പ്രീക്വാർട്ടറിലേക്ക് മുന്നേറുന്ന ടൂർണമെന്റിന്റെ ഫൈനലിനും അൽ ബൈത്ത് സ്റ്റേഡിയമാണ് വേദിയാവുന്നത്. ഖത്തർ ദേശീയദിനമായ ഡിസംബർ 18 നാണ് കലാശപ്പോരാട്ടം. ഇറാഖി ഗായിക റഹ്മ സിയാദ് നേതൃത്വം നൽകുന്ന സംഗീതനിശയോടെയാണ് അൽ ബൈത്ത് സ്റ്റേഡിയം ഉദ്ഘാടനം ചെയ്യപ്പെടുകയെന്ന് സംഘാടകർ അറിയിച്ചു. ഫിഫയുടെ ഔദ്യോഗിക വെബ്‌സൈറ്റായ http://FIFA.com/tickets ലൂടെയാണ് ടൂർണമെന്റിന്റെ ടിക്കറ്റുകൾ ലഭ്യമാവുക. അമീർ കപ്പിൽ വിജയകരമായി പരീക്ഷിച്ച ഫാൻ ഐഡി കാർഡും അറബ് കപ്പിലുണ്ട്. http://fac21.qa വെബ്‌സൈറ്റ് സന്ദർശിച്ച് ഐഡി കാർഡ് സ്വന്തമാക്കിയവർക്ക് മാത്രമേ സ്റ്റേഡിയങ്ങളിൽ പ്രവേശനം ലഭിക്കൂ. രണ്ട് ഡോസ് വാക്സിനേഷനും സ്വീകരിച്ചതാണെന്ന സർട്ടിഫിക്കറ്റും കാണികൾ കയ്യിൽ കരുതണമെന്ന് സംഘാടകർ ഓർമിപ്പിച്ചു.
